కరోనా సోకిందని కుటుంబంలో ఘర్షణ... ఆత్మహత్యాయత్నం.. చివరకు

కరోనా సోకిందన్న అనుమానం పెనుభూతమై ఓ నిండు ప్రాణాన్ని బలితీసుకున్న సంఘటన వరంగల్ రూరల్ జిల్లా నెక్కొండ మండలంలోని దీక్షకుంట్లలో చోటు చేసుకుంది. దీక్షకుంట్ల గ్రామానికి చెందిన బండారు కుమారస్వామి (45) గత కొద్ది రోజులుగా జ్వరంతో బాధ పడుతున్నాడు. దానికి తోడు సరిగా తినకపోవడంతో నీరసించిపోయాడు. దీంతో అతడికి కరోనా సోకిందేమో అని కుటుంబ సభ్యుల్లో మొదలైన అనుమానం ఘర్షణకు దారి తీసింది.

ఈ నేపథ్యంలో నాలుగు రోజుల కిందట కుమారస్వామి పురుగుల మందు సేవించి ఆత్మహత్యాయత్నం చేశాడు. వెంటనే అతన్ని నెక్కొండలోని ఆస్పత్రికి తరలించారు. అయితే రెండ్రోజుల చికిత్స అనంతరం అక్కడ నుండి వరంగల్ లోని ఎంజీఎం ఆస్పత్రికి శనివారం తరలించారు. శనివారం సాయంత్రం టెస్ట్ చేయగా మొదట నెగటివ్ వచ్చినట్లు కుటుంబ సభ్యులు తెలిపారు. ఆదివారం పొద్దున మరోసారి చేయగా పాజిటివ్ గా వచ్చినట్లు సమాచారం.

ఈలోపే అతని ఆరోగ్య పరిస్థితి విషమించడంతో ఆస్పత్రిలో మృతి చెందాడు. అతని మృతదేహన్ని స్వగ్రామమైన దీక్షకుంట్లకి సోమవారం ఉదయం తరలించారు. గ్రామ పంచాయతీ సిబ్బంది తగు జాగ్రత్తలు తీసుకొని దహనసంస్కారాలు పూర్తి చేశారు.