ములుగులో ముసలం.. మహిళా మంత్రికి సెగ, రాజీనామా హెచ్చరికలు

ములుగు జిల్లా టీఆర్ఎస్ పార్టీలో ముసలం రేగింది. అధికార పార్టీ ప్రజాప్రతినిధులు, మండల పార్టీ నేతలు ఇన్‌చార్జి మంత్రి సత్యవతి రాథోడ్‌కి వ్యతిరేకంగా సమావేశమవడం కలకలం రేపుతోంది. దళిత బంధు లబ్ధిదారుల ఎంపికతో అసమ్మతి రేగింది. టీఆర్ఎస్ పార్టీ కోసం పనిచేసిన వారికి కాకుండా స్థానిక కాంగ్రెస్ ఎమ్మెల్యే సీతక్క చెప్పిన విధంగా కాంగ్రెస్ కార్యకర్తలను ఎంపిక చేశారని ఆగ్రహం వ్యక్తం చేస్తున్నారు. మంత్రికి వ్యతిరేకంగా నియోజకవర్గంలోని టీఆర్ఎస్ జడ్పీటీసీలు, ఎంపీటీసీలు, సర్పంచ్‌లు తాడ్వాయిలో ప్రత్యేకంగా సమావేశమయ్యారు.

దళిత బంధు లబ్ధిదారుల ఎంపికలో పార్టీ కోసం పనిచేసిన వారికి తీవ్ర అన్యాయం జరిగిందని వారు ఆరోపిస్తున్నారు. మంత్రి సత్యవతి రాథోడ్ ఎమ్మెల్యే సీతక్క చెప్పిన వారిని దళిత బంధుకి ఎంపిక చేశారని మండిపడుతున్నారు. సొంత పార్టీ కార్యకర్తలను పక్కనబెట్టి.. కాంగ్రెస్ కార్యకర్తలను ఎంపిక చేయడమేంటని వారు ప్రశ్నిస్తున్నారు. మంత్రి రాథోడ్ వైఖరికి నిరసనగా రాజీనామాలకు సిద్ధమయ్యారు. దళిత బంధు లబ్ధిదారుల జాబితాను సవరించేలా అధికారులకు ఆదేశాలివ్వాలని.. లేకుంటే మూకుమ్మడిగా రాజీనామాలు చేస్తామన్నారు. ఈ మేరకు ముఖ్యమంత్రి కేసీఆర్, మంత్రి కేటీఆర్‌కి బహిరంగ లేఖ రాశారు. సమస్య పరిష్కరించాలని కోరుతున్నారు

ఇప్పటికే పొరుగునే ఉన్న మహబూబాబాద్ జిల్లాలో వర్గపోరు బహిర్గతమైంది. రైతు దీక్షలో ఎంపీ కవిత చేతిలో నుంచి ఎమ్మెల్యే మైక్ లాగేసుకోవడం.. మహబూబాబాద్ హెడ్‌క్వార్టర్ తనదంటూ వ్యాఖ్యానించడం వివాదానికి దారితీసింది. అక్కడే ఉన్న సీనియర్ నేత రెడ్యా నాయక్ సైతం ఎమ్మెల్యే తీరుపై అసహనం వ్యక్తం చేశారు. తాజాగా ములుగు జిల్లా టీఆర్ఎస్‌లోనూ అసమ్మతి రేగడం పార్టీని ఇరుకునపెడుతోంది. గులాబీ పార్టీ ప్రజాప్రతినిధులు, మండల పార్టీ అధ్యక్షులు రాజీనామాలకు సిద్ధమవడం హీట్ పెంచుతోంది.

Also Read: