కరాచీ నగరం పాకిస్థాన్లోనే ఉందనేందుకు తగిన ఆధారాలేమైనా ఉన్నాయా అని భారతదేశాన్ని పాక్ ప్రభుత్వం అడిగింది. కరాచీ నగరం పాకిస్థాన్లోనే ఉన్నట్లు తమకు మరిన్ని ఆధారాలు చూపాలని కోరింది. దావూద్ కరాచీలోనే ఉన్నాడని తేలినా, ఇందుకు భారతదేశం సమర్పించిన ఆధారాల్లో కరాచీ నగరం పాకిస్థాన్లోనే ఉన్నట్లు ఆధారం చూపనందున తామేమీ చేయలేమని చెప్పింది. కరాచీ నగరం పాకిస్థాన్లోనే ఉన్నట్లు భారత్ తగు ఆధారాలను అందించేవరకు ఈ కేసులో తామేమీ చేయలేమంది.
ఈ సందర్భంగా ఒక విలేకరి కరాచీ నగరం పాకిస్థాన్లోనే ఉందని మ్యాప్ ఒకదాన్ని చూపగా దాన్ని కూడా పాక్ ప్రభుత్వం తోసిపుచ్చింది. మ్యాప్ లు ఆధారంగా చేసుకుని నిర్ణయానికి రాలేమని చెప్పింది. ఇందుకు ఒక ఉదాహరణ కూడా చూపింది. భారత్ మ్యాప్ లో కాశ్మీర్ భారతదేశంలోనే ఉన్నట్లు కనిపిస్తుంది. కానీ అది పాకిస్థాన్లో ఉందని అందరికి తెలుసని పాక్ అధికారి ఒకరు వ్యాఖ్యానించారు. భారత్ ఇకనైనా దావూద్ ను తనకు అప్పగించాలని డిమాండ్ చేయడం మానుకోవాలని, దావూద్ చాలా మంచివాడని, చట్టాన్ని గౌరవించే తీవ్రవాది అని ఈ సందర్భంగా ఆయన చెప్పారు. అయితే తాము మాట్లాడే చట్టం పాక్ చట్టమా లేక షరియా చట్టమా అనేదానిపై తమకే అంతుపట్టని విషయంగా ఆ అధికారి లోలోపల గొణుక్కోవడం విశేషం. దావూద్ లాంటి అమాయక నేరగాడి వెనకపడటాన్ని భారత్ మానుకోవాలని హితవు పలికారు. దావూద్ చాలా గౌరవనీయమైన తీవ్రవాది అని, ఆయనలా చట్టాలను గౌరవించే తీవ్రవాది ఇంకొకడు ఉండడన్నారు. పలు తీవ్రవాద కార్యకలాపాలు నిర్వహించడం, దోపిడీలు, మ్యాచ్ ఫిక్సింగులు, స్మగ్లింగ్ చేయడం లాంటి కార్యకలాపాల ద్వారా ఆర్జించే సంపదపై అతను ఠంచనుగా, పొల్లుపోకుండా పన్నులు చెల్లిస్తున్నాడని ఈ సందర్భంగా మరో ఐఎస్ఐ అధికారి, పార్ట్ టైమ్ టెర్రరిస్ట్ అయిన వ్యక్తి కితాబునిచ్చాడు.