నిన్నటివరకు లక్ష్మీ దేవి... ఇప్పుడేమో వేస్ట్ పేపరా ?

ఒక్క ఓవర్ నైట్‌లో ఎంత పని జరిగిపోయింది! నిన్నటివరకు రూ.500 లేదా 1000 నోటు కిందపడితే.. అమ్మో లక్ష్మీ దేవి అని కళ్లకు అద్దుకుని అంతే పదిలంగా జేబులో పెట్టుకునే సన్నివేశాలు చూశాం. కానీ ఎప్పుడైతే ఈ పాత నోట్లు రేపటి నుంచి చలామణి కావు అని ప్రధాని నరేంద్ర మోడీ ఓ ప్రకటన చేశారో... అప్పటినుంచే ఆయా నోట్లపై సోషల్ మీడియాలో అనేక సెటైర్లు, జోకులు కనబడటం మొదలయ్యాయి.

పాత నోట్లని పల్లీలు, బటానీలు, మిక్చర్ వంటి తినుబండారాలని పొట్లం కట్టుకోవడానికి ఉపయోగిస్తున్నట్టుగా వున్న ఫోటోలు కొన్ని ఫేస్‌బుక్, ట్విటర్, వాట్సాప్ వంటి సోషల్ మీడియాల్లో దర్శనం ఇస్తున్నాయి.

ఇంకొన్ని ఫోటోల్లో ఇవే రూ.500, 1000 నోట్లకు కాలం చెల్లింది అనేదానికి సంకేతంగా ఆయా నోట్లకు పూలదండలు వేసి రెస్ట్ ఇన్ పీస్ అనే సందేశాలు రాస్తున్నారు కొందరు నెటిజెన్లు.

కేంద్రం ఇచ్చిన గడువులోగా పాత నోట్లని కొత్త నోట్లుగా మార్చుకోకపోతే రావాల్సిన దుస్థితి ఇది. కానీ సోషల్ మీడియా, డిజిటల్ మీడియా పుణ్యమా అని అంతకన్నా ముందే ఆ నోట్లకు కాలం చెల్లింది అనే రకమైన ప్రచారం మొదలైంది.