Aamir Khan: లాల్ సింగ్ చడ్డాకు మరో ఎదురుదెబ్బ.. అయ్యో ఆమిర్ ఖాన్

బాలీవుడ్ మిస్టర్ పర్ఫెక్ట్ ఆమిర్ ఖాన్ (Aamir Khan) హీరోగా నటించిన లేటెస్ట్ మూవీ లాల్ సింగ్ చడ్డా (Laal Singh Chaddha). ఆగస్టు 11న ఆడియన్స్ ముందుకు వచ్చిన ఈ మూవీ భారీ డిజాస్టర్‌గా నిలిచింది. ఆమిర్ ఖాన్ ఈ మూవీపై ఎన్నో ఆశలు పెట్టుకున్నా.. ఆ ఆశలన్నీ అడియాసలయ్యాయి. నాలుగేళ్ల గ్యాప్ తరువాత థియేటర్స్‌లో సందడి చేసినా ప్రేక్షకులను మెప్పించలేకపోయాడు. ఇప్పటికే భారీ నష్టాలను ఎదుర్కొంటున్న లాల్ సింగ్ చడ్డా మూవీకి మరో ఎదురుదెబ్బ తగిలింది. ఓటీటీలో రిలీజ్ చేసేందుకు కూడా ఎవరూ ముందుకు రావడం లేదని వార్తలు వినిపిస్తున్నాయి.

లాల్ సింగ్ చడ్డా మూవీకి సంబంధించి ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ ఒప్పందాన్ని రద్దు చేసుకున్నట్లు తెలుస్తోంది. మూవీకి డిజాస్టర్ టాక్ రావడంతో డీల్ క్యాన్సిల్ చేసుకున్నట్లు సమాచారం. ఈ సినిమా ఓటీటీ రైట్స్ కోసం ఆమిర్ ఖాన్‌తో రూ.200 కోట్లతో మొదట డీల్ కుదిరిందట. థియేటర్‌ రిలీజ్‌కు.. ఓటీటీలో విడుదల మధ్య మూడు నెలల గ్యాప్ ఉంచాలని కండీషన్ కూడా పెట్టారట. అయితే ఈ చిత్రం బాక్సాఫీస్ వద్ద ఘోరంగా పరాజయం పాలైన తరువాత నెట్‌ఫ్లిక్స్ డీల్ క్యాన్సిల్ చేసుకుందని బాలీవుడ్‌లో వార్తలు చక్కర్లు కొడుతున్నాయి. ఇప్పటికే సరైన కలెక్షన్స్ లేక డీలా పడిపోయిన మూవీ టీమ్‌కు.. ఓటీటీ డీల్ క్యాన్సిల్ అవ్వడం పెద్ద ఎదురుదెబ్బ అని విశ్లేషకులు అంటున్నారు.

హాలీవుడ్ మూవీ 'ఫారెస్ట్ గంప్'కి రీమేక్‌గా వచ్చిన లాల్ సింగ్ చడ్డా మూవీపై విడుదలకు ముందు నుంచే నెగిటివ్ ప్రచారం జరిగింది. గతంలో ఆమిర్ ఖాన్ చేసిన వ్యాఖ్యలు గుర్తు చేస్తూ.. ఈ సినిమాను బాయ్‌కాట్ చేయాలంటూ సోషల్ మీడియాలో ప్రచారం చేశారు. అయితే సినిమా బాగుంటే.. ఇలాంటి నెగిటివ్ ప్రచారాలన్నీ కొట్టుకుపోతాయని అందరూ భావించారు. కానీ సినిమా ఏ మాత్రం బాగోలేకపోవడంతో కలెక్షన్లు దారుణంగా పడిపోయాయి. ఈ మూవీలో క‌రీనా క‌పూర్ (Kareena Kapoor) హీరోయిన్‌గా యాక్ట్ చేయగా.. అక్కినేని నాగ చైత‌న్య (Naga Chaitanya) కీలక పాత్ర పోషించాడు. తెలుగులో మెగాస్టార్ చిరంజీవి (Chiranjeevi) సమర్పించారు. అద్వైత్ చందన్ దర్శకత్వం వహించాడు.