యంగ్ హీరోయిన్ సీక్రెట్ మ్యారేజ్.. వీడియో చూసి ఆశ్చర్యపోయిన ప్రేక్షకులు

లాక్‌డౌన్ వేళ సినీ ఇండస్ట్రీలో పెళ్లి బాజాలు బాగానే మోగుతున్నాయి. ఇప్పటికే తెలుగు చిత్రసీమ నుంచి దిల్ రాజు రెండో పెళ్లి, నిఖిల్ ప్రేమ వివాహం, దగ్గుబాటి రానా రోకా ఫంక్షన్ జరగగా.. హీరో నితిన్ పెళ్లి చేసుకునేందుకు రెడీ అయ్యారు. ఇక సాయి ధరమ్ తేజ్, వరుణ్ తేజ్ పెళ్లికి గ్రీన్ సిగ్నల్ ఇచ్చేశారు. ఈ క్రమంలోనే నేడు (జూన్ 12) ఓ కన్నడ హీరోయిన్ సీక్రెట్ మ్యారేజ్ చేసుకోవడం హాట్ టాపిక్ అయింది.

Also Read: నువ్వొచ్చి పాఠాలు చెప్పు.. డైరెక్టర్ క్రిష్, మంచు లక్ష్మి ‘ఆన్‌లైన్’ వార్

కన్నడ హీరోయిన్ మయూరి క్యాటరీ తన స్నేహితుడైన అరుణ్‌ని గుట్టుచప్పుడు కాకుండా పెళ్లాడింది. నేటి ఉదయం శ్రీ తిరుమలగిరి శ్రీ లక్ష్మీ వెంకటేశ్వర స్వామి ఆలయంలో వీరిద్దరి వివాహం చాలా సింపుల్‌గా కేవలం స్నేహితుల సమక్షంలో జరిగింది. లాక్‌డౌన్ నిబంధనలు పాటిస్తూ ఎలాంటి హంగు, ఆర్భాటాలు లేకుండా అత్యంత సీక్రెట్‌గా ఈ వివాహం జరిగింది. అరుణ్‌ని పెళ్లాడిన తర్వాత.. తన పెళ్లి వీడియోను మయూరి క్యాటరీనే స్వయంగా సోషల్ మీడియాలో పోస్ట్ చేసి అందరినీ ఆశ్చర్యపరిచింది.

''అవును ఈ రోజు నేను, అరుణ్ ఉదయం వివాహం బంధంతో ఒక్కటయ్యాం. మా పదేళ్ల స్నేహానికి ఈ రోజు (జూన్ 12) అర్థవంతమైన ముగింపు లభించింది'' అని పేర్కొంటూ తన మెడలో అరుణ్ మూడుముళ్ళేస్తున్న వీడియో పోస్ట్ చేసింది మయూరి. దీంతో ఈ వీడియో సోషల్ మీడియాలో వైరల్ అయింది. మయూరి క్యాటరీ పెళ్లి వీడియో చూసి కన్నడ సినీ ప్రేక్షకులు, తోటి నటీనటులు ఆమెకు అదే సోషల్ మీడియా ద్వారా శుభాకాంక్షలు తెలుపుతున్నారు.