Sushmita Sen: కొత్త బాయ్‌ఫ్రెండ్‌తో బ్రేకప్.. మాజీ ప్రియుడితో నటి పార్టీ

ఐపీఎల్ మాజీ ఛైర్మన్ లలిత్ మోడీ (Lalit Modi), మాజీ మిస్ యూనివర్స్ సుస్మితా సేన్ (Sushmita Sen) బ్రేకప్ వార్తలు నెట్టింట వైరల్ అవుతున్నాయి. లలిత్ మోడీ తన డీపీగా ఉన్న పిక్‌ను తొలగించడంతో జోరుగా రూమర్లు క్రియేట్ అవుతున్నాయి. తామిద్దరం రిలేషన్‌షిప్‌లో ఉన్నామంటూ జులై నెలలో ట్విట్టర్ వేదికగా లలిత్ మోడీ ప్రకటించిన విషయం తెలిసిందే. ఇద్దరు కలిసి క్లోజ్‌గా ఉన్న ఫొటోలను ఆయన షేర్ చేసుకున్నారు. సుస్మితా తన బెటర్ హాఫ్ అని.. ఏదో ఒక రోజు పెళ్లి చేసుకుంటామని ప్రకటించారు. కానీ ఇంతలోనే ఏమైందో ఏమో తెలియదు గానీ ఇద్దరు బ్రేకప్ చెప్పుకున్నట్లు ప్రచారం జరుగుతోంది.

లలిత్ మోడీకు బ్రేకప్ చెప్పిన సుస్మితా సేన తన మాజీ ప్రియుడు రోహ్మాన్‌తో ఎక్కువగా క్లోజ్‌గా ఉంటున్నట్లు బాలీవుడ్‌లో వార్తలు వస్తున్నాయి. వీరిద్దరు కలిసి ఉన్న ఫొటోలు నెట్టింట వైరల్ అవుతున్నాయి. లలిత్ మోడీతో విడిపోవడడానికి కారణం అతనేనని ఊహాగానాలు వినిపిస్తున్నాయి. ఇటీవల సుస్మితా సేన్ తన సోషల్ మీడియాలో రోహ్మన్‌తో కలిసి ఉన్న ఫొటోలను షేర్ చేసుకోవడం ఈ వార్తలకు బలాన్ని చేకూర్చింది. ఆ తర్వాత సుస్మితా, రోహ్మాన్ మధ్య ఏదో నడుస్తోందని వార్తలు వచ్చాయి.

అంతేకాకుండా సుస్మితా సేన్ తన పెద్ద కుమార్తె బర్త్ డే పార్టీకి రోహ్మాన్‌ను కూడా ఆహ్వానించారు. అందరూ కలిసి పార్టీ చేసుకున్నట్లు తెలుస్తోంది. ఇందుకు సంబంధించిన ఫొటోలను సుస్మితా సేన్ ఇన్‌స్టాగ్రామ్‌లో పంచుకున్నారు. గతంలో సుస్మితా సేన్ తల్లి పుట్టినరోజు వేడుకకు కూడా రోహ్మాన్ హాజరయ్యారు. తామిద్దరం విడిపోయినా స్నేహితులుగా కలిసే ఉంటామని సుస్మితా-రోహ్మాన్ బ్రేకప్ సమయంలో సోషల్ మీడియాలో రాసుకొచ్చారు.

మరి ఇప్పుడు ఫ్రెండ్‌షిప్ కొద్ది కలిశారా..? ఇద్దరి మధ్య మరేదైనా ఉందా..? అని నెటిజన్లు అనుమానం వ్యక్తం చేస్తున్నారు. కొత్త బాయ్ ఫ్రెండ్‌తో బ్రేకప్.. మాజీ ప్రియుడితో పార్టీ అంటూ కామెంట్స్ పెడుతున్నారు. ప్రొఫైల్ పిక్స్ ఛేంజ్ చేసిన లలిత్ మోడీ.. సుస్మితా కలిసి ఉన్న ఫొటోలను అలానే ఉంచారు. వీరిద్దరి బ్రేకప్‌పై అధికారిక ప్రకటన రాలేదు.