HBD Vivek Oberoi: ఐశ్వర్య రాయ్ కోసం వివేక్ ఒబెరాయ్‌‌ను సల్మాన్ బెదిరించాడా..! అప్పుడు ఏం జరిగింది..?

హైదరాబాద్‌లో జన్మించి.. బాలీవుడ్‌లో స్టార్ యాక్టర్‌గా ఎదిగారు వివేక్ ఒబెరాయ్ (Vivek Oberoi). కాంట్రవర్సీ కింగ్ రామ్ గోపాల్ వర్మ (Ram Gopal Varma) దర్శకత్వం వహించిన కంపెనీ సినిమాతో అతను బాలీవుడ్‌లోకి ఎంట్రీ ఇచ్చారు. తొలి మూవీకి ఫిల్మ్‌ఫేర్‌లో బెస్ట్ డెబ్యూ మేల్ అవార్డును అందుకోవడం విశేషం. వివేక్ ఒబెరాయ్ తండ్రి సురేష్ ఒబెరాయ్ కూడా బాలీవుడ్ పరిశ్రమలో సుపరిచితమైన పేరు. ప్రస్తుతం వివేక్ ఒబెరాయ్ నటుడిగానే కాకుండా.. స్వయంగా ప్రొడక్షన్ హౌస్ కూడా నడుపుతున్నారు. నేడు (సెప్టెంబర్ 3) ఆయన పుట్టినరోజు సందర్భంగా కొన్ని విషయాలు తెలుసుకుందాం..

వివేత్ ఒబెరాయ్ తన యాక్టింగ్ లైఫ్ కంటే.. వ్యక్తిగత జీవితం గురించే ఎక్కవగా చర్చలో నిలిచారు. బాలీవుడ్‌లో నటుడిగా కెరీర్ ఆరంభించిన తరువాత అతని సినిమాలు అందరికీ నచ్చాయి కానీ.. బాక్సాఫీసు వద్ద పెద్దగా హిట్ కాలేకపోయాయి. సినిమాల కంటే అప్పట్లో ఐశ్వర్యరాయ్‌తో వివేక్ ఒబెరాయ్ ఎఫైర్‌పైనే ఎక్కువగా చర్చ జరిగింది. వీరిద్దరు డేటింగ్‌లో ఉన్నారని జోరుగా ప్రచారం జరిగింది. ఐశ్వర్యరాయ్‌ కోసం వివేక్‌ను సల్మాన్ బెదిరించినట్లు వార్తలు వచ్చాయి. ఆ తర్వాత వివేక్, ఐశ్వర్య విడిపోయారు.

ఐశ్వర్యరాయ్‌తో బ్రేక్ అప్ తరువాత వివేక్ ఒబెరాయ్ ఏ నటితో డేటింగ్ చేస్తున్నట్లు వార్తలు రాలేదు. అంతేకాకుండా కొంతకాలం సినీ పరిశ్రమ నుంచి బ్రేక్ తీసుకున్నారు. 2010లో కర్ణాటక మాజీ మంత్రి జీవరాజ్ అల్వా కుమార్తె ప్రియాంక అల్వాను పెళ్లి చేసుకున్నారు. ఆమె సామాజిక కార్యకర్త కూడా సేవ చేస్తున్నారు. అనేక ఎన్జీవోలలో పనిచేశారు. ఇద్దరూ సోషల్ మీడియాలో చాలా యాక్టివ్‌గా ఉంటారు. ప్రియాంక చేస్తున్న మంచి పనికి వివేక్ ఒబెరాయ్ ఎప్పుడు అండగా నిలబడుతుంటారు.

హిందీలో పలు సూపర్ హిట్ చిత్రాల్లో నటించిన వివేక్ ఒబెరాయ్.. తెలుగు అభిమానులకు పరిచయమే. ఆర్జీవీ డైరెక్షన్‌లో రూపొందిన రక్తచరిత్ర, రక్తచరిత్ర-2 చిత్రాల్లో నటించారు. పరిటాల రవి క్యారెక్టర్‌లో అందరినీ మెప్పించారు. వివేక్ నటనకు మంచి మార్కలే పడ్డాయి. రామ్ చరణ్ 'వినయ విధేయ రామ' మూవీలో విలన్‌గా యాక్ట్ చేశారు. సినిమా బాక్సాఫీసు వద్ద డిజాస్టర్‌గా నిలిచింది. అయితే ఇందులో ఆయన యాక్టింగ్, డైలాగ్స్ ఆడియన్స్‌కు బాగా నచ్చాయి. ఆ తరువాత ఆయన మళ్లీ డైరెక్ట్‌గా తెలుగులో యాక్ట్ చేయలేదు. ఇటీవలె మలయాళీ మూవీ కడువా ద్వారా ఆడియన్స్‌ను అలరించారు. ఈ సినిమా తెలుగులో కూడా డబ్ అయింది. వివేక్ ఒబెరాయ్ ఫిల్మ్ కెరీర్‌లో అనేక అవార్డులను అందుకున్నారు.