Kaun Banega Crorepati 14: ప్రధాని నరేంద్ర మోదీకి సంబంధించిన ప్రశ్న.. సమాధానం తెలియక గేమ్ నుంచి ఔట్

హిందీలో పాపులర్ టీవీ షోస్‌లో కౌన్ బనేగా కరోడ్‌పతి (Kaun Banega Crorepati) ఒకటి. ఈ షో 14వ సీజన్ విజయవంతంగా జరుగుతోంది. బాలీవుడ్ సూపర్ స్టార్ అమితాబ్ బచ్చన్ (Amitabh Bachchan) హోస్ట్‌గా ఈ షోకు బుల్లితెర ప్రేక్షకులు ఆసక్తిగా ఎదురుచూస్తుంటారు. ఈ షో ద్వారా జనరల్ నాలెడ్జ్ పెరగడమే కాకుండా.. బిగ్ బీ చెప్పే విషయాలు కూడా ఎంతో ఇంట్రెస్టింగ్‌గా ఉంటాయి. KBC 14 తాజా ఎపిసోడ్‌లో విశాల్ శర్మ (Vishal Sharma) అనే వ్యక్తి రూ.25 లక్షల గెలుచుకునే అవకాశాన్ని చేజార్చుకున్నాడు.

కృష్ణ శర్మ అనే వ్యక్తి తరువాత విశాల్ శర్మ హాట్ సీట్‌లో వచ్చాడు. జమ్మూ కశ్మీర్‌కు విశాల్.. ఓ స్టూడెంట్ అంటూ అందరికీ పరిచయం చేశారు అమితాబ్. నియంత్రణ రేఖ సరిహద్దుకు అతి సమీపంలో ఉన్న విశాల్ స్వస్థలం గురించి కూడా బిగ్ బీ మాట్లాడారు. ఆ తరువాత గేమ్ ప్రారంభించి.. హిందీలో 'ఛంపి' అనే పదాన్ని ఏ కార్యకలాపానికి ఉపయోగిస్తారని వెయ్యి రూపాయలకు మొదటి ప్రశ్న అడిగారు. సరైన సమాధానాన్ని 'మసాజ్' అని వివరిస్తూ.. విశాల్ తన ఖాతా తెరిచాడు. అలా అన్ని ప్రశ్నలకు సమాధానాలు ఇస్తూ.. రూ.12 లక్షల 50 వేలు గెలుచుకున్నాడు. రూ.25 లక్షల ప్రశ్నగా.. ప్రధాని నరేంద్ర మోదీకి సంబంధించిన ప్రశ్నను అమితాబ్ అడిగారు.

2014లో అధికారంలోకి వచ్చిన తర్వాత ప్రధాని నరేంద్ర మోదీ ఇంతవరకు ఏ దేశాన్ని సందర్శించలేదు..?

ఎ) మొజాంబిక్ బి) ఈజిప్ట్ సి) లావోస్ డి) ఫిలిప్పీన్స్ ఆప్షన్ ఇచ్చారు.

తనకు కచ్చితమైన సమాధానం తెలియదని కంటెస్టెంట్ విశాల్ అన్నాడు. దీంతో రిస్క్ చేసేందుకు ఇష్టపడలేదు. గేమ్ నుంచి క్విట్ అవుతున్నట్లు తెలిపాడు. అయితే ఆన్సర్ గేస్ చేయాలని అమితాబ్ అడగ్గా.. ఆప్షన్ సి) లావోస్‌ను అన్నాడు. కానీ.. ఈ సమాధానం తప్పు అని.. కరెక్ట్ ఆన్సన్ ఆప్షన్ బి) ఈజిప్ట్ అని బిగ్ బీ చెప్పారు. ఈజిప్ట్ దేశానికి అక్కడ ప్రధాని మోదీ ఇంకా వెళ్లలేదన్నారు. అనంతరం విశాల్‌ను అమితాబ్ బచ్చన్ అభినందిస్తూ.. అతను గెలుచుకున్న రూ.12 లక్షల 50 వేల క్యాష్ ప్రైజ్‌ను అందజేశారు. ఇటీవలె క్రికెట్‌కు సంబంధించి ప్రశ్నకు సమాధానం చెప్పలేక కవితా చావ్లా (Kavita Chawla) అనే మహిళ రూ.7.5 కోట్లు గెలుచుకునే ఛాన్స్ మిస్ చేసుకున్న సంగతి తెలిసిందే. ఆమె కోటి రూపాయలు గెలుచుకుని కౌన్ బనేగా కరోడ్‌పతి గేమ్ నుంచి క్విట్ అయ్యారు.