మేమిద్దరం డ్రింక్ చేసి అంటూ ప్రియాంక చోప్రా ఓపెన్ కామెంట్స్.. భర్త నిక్ షాక్!!

బాలీవుడ్ బ్యూటీ ప్రియాంక చోప్రా తనకంటే పదేళ్లు చిన్నవాడైన అమెరికన్ సింగర్ నిక్ జోనాస్‌తో ప్రేమలో పడి పెళ్లి చేసుకున్న సంగతి తెలిసిందే. గత కొన్నేళ్లుగా వైవాహిక జీవితం ఎంజాయ్ చేస్తున్న ఈ ఇద్దరూ విడాకులు తీసుకోనున్నారంటూ గత రెండు మూడు రోజులుగా పుకార్లు షికారు చేశాయి. ఆమె ఇన్‌స్టా ఖాతా నుంచి జొనాస్‌ పేరు తొలగించడంతో అంతా ఆలోచనలో పడ్డారు. ఈ క్రమంలోనే మంగళవారం ఉదయం నిక్‌ ఓ వర్కౌట్‌ వీడియో షేర్‌ చేయగా.. ‘మీ కండలపై మనసు పారేసుకున్నాను’ అంటూ లవ్‌ సింబల్‌ ఎమోజీతో ఓ కామెంట్‌ పెట్టి ఆ పుకార్లకు ఫుల్ స్టాప్ పెట్టింది ప్రియాంక. ఈ నేపథ్యంలోనే తాజాగా జరిగిన ప్రోగ్రామ్‌లో భర్తను ఓ ఆట ఆడుకుంది ఈ గ్లోబల్ బ్యూటీ.

ఓటీటీ వేదిక నెట్‌ఫ్లిక్స్‌‌లో ప్రసారమవుతున్న ‘జొనాస్‌ బ్రదర్స్ ఫ్యామిలీ రోస్ట్‌’ అనే షోలో జొనాస్‌ బ్రదర్స్‌తోపాటు వారి వారి సతీమణులు పాల్గొని సందడి చేశారు. ప్రముఖ కమెడియన్‌ కెనన్ థాంప్సన్ హోస్ట్‌గా చేస్తున్న ఈ షోలో ప్రియాంక చోప్రా తన నిక్‌ని ఓ ఆట ఆడుకుంది. తన భర్త నిక్‌ జొనాస్‌, ఆయన సోదరుల కంటే కూడా తనకే ఎక్కువమంది ఫాలోవర్స్‌ ఉన్నారని చెబుతూ హల్చల్ చేసింది. అనంతరం నిక్‌ అంటే తనకెంత ఇష్టమో బయటపెడుతూ ఓపెన్ అయింది.

సంస్కృతి, ఎంటర్‌టైన్‌మెంట్‌, సంగీతానికి గొప్పస్థానం ఉన్న ఇండియా నుంచి తాను వచ్చానని, ఈ షోలో పాల్గొని తన భర్త నిక్‌ జొనాస్‌తోపాటు ఆయన సోదరులను రోస్ట్‌ చేయడం తనకెంతో థ్రిల్లింగ్‌గా ఉందని చెప్పింది. వయసులో పదేళ్ల తేడా ఉన్నా కూడా నిక్‌‌తో చాలా విషయాలు చర్చిస్తుంటానని, ఒకరి నుంచి మరొకరం చాలా నేర్చుకుంటామని చెప్పింది. నిక్‌పై తనకెంతో ప్రేమ ఉందని చెప్పిన ప్రియాంక.. అతను తన జీవితాన్ని ఎంతో మార్చేశాడని చెప్పుకొచ్చింది. నిజం చెప్పాలంటే ఇప్పటికీ మా ఇద్దరికీ పిల్లలు లేరు. కానీ ఈ రోజు మీ అందరి ముందు ఓ విషయాన్ని చెప్పాలనుకుంటున్నాను. మేమిద్దరమే అని ప్రియాంక చెప్పడంతో నిక్‌ ఒక్కసారిగా షాకయ్యాడు.
Samantha Ruth Prabhu : నాగ చైతన్యపై సమంత అలా పగ సాధిస్తుందా? అబ్బో సామ్ మామూల్ది కాదుగా!
''మేమిద్దరం ఈ రోజు రాత్రి డ్రింక్‌ చేసి.. రేపు ఉదయం ప్రశాంతంగా నిద్రపోవాలి అనుకుంటున్నాం'' అని సరదా మాటలు చెబుతూ అందరినీ నవ్వించింది ప్రియాంక. ఇలా వీరిద్దరి విడాకుల వార్తలకు మరోసారి చెక్ పెట్టినట్లయింది.