ఈ ఏడాదే సుశాంత్ పెళ్లి.. ఇంతలో ఘోరం! మరణం తర్వాత బయటపడుతున్న వాస్తవాలు

యువ నటుడు సుశాంత్ సింగ్ రాజ్‌పుత్ ఆత్మహత్య దేశవ్యాప్తంగా సంచలనం సృష్టించింది. ఆదివారం (జూన్ 14) ముంబైలోని ఆయన ఇంట్లోనే ఉరివేసుకొని సుశాంత్ ఆత్మహత్యకు పాల్పడటం సినీలోకాన్ని తీవ్ర విషాదంలోకి నెట్టేసింది. 34 యేళ్ల వయసులోనే సుశాంత్ జీవితం అర్దాంతరంగా ముగియడాన్ని ఎవ్వరూ జీర్ణించుకోలేక పోతున్నారు. ఆయన మృతి పట్ల పలువురు బాలీవుడ్, టాలీవుడ్ సినీ ప్రముఖులు సంతాపం తెలియజేశారు. సినీ ఇండీస్ట్రీ ఓ టాలెంటెడ్ యాక్టర్‌ని కోల్పోయిందంటూ ఆవేదన చెందారు.

కాగా సుశాంత్ మరణంతో కన్నీరుమున్నీరైన ఆయన కుటుంబ సభ్యులు ఆయన పెళ్లి గురించి చెబుతూ తీవ్ర ఆవేదన చెందారు. సుశాంత్ ఈ ఏడాది నవంబర్‌లో వివాహం చేసుకోవాల‌నుకున్నాడ‌ని, వివాహానికి సన్నాహాలు కూడా ప్రారంభమయ్యాని అత‌ని వ‌రుస సోద‌రుడు పన్నా సింగ్ తెలిపాడు. ఇంతలో ఈ ఘోరం చూడాల్సి వచ్చిందని చెబుతూ కన్నీరు పెట్టుకున్నాడు. అయితే సుశాంత్ ఎవరిని పెళ్లి చేసుకోబుతున్నాడనే విషయాన్ని మాత్రం ఆయన ప్రస్తావించలేదు.

Also Read: సుశాంత్ ఆత్మహత్యపై అనుమానాలు.. ఈ మరణం వెనుక పెద్ద కుట్రే ఉందంటూ మామ ఆవేదన

మరోవైపు సుశాంత్ ఆత్మహత్య చేసుకోలేదని, అతనిని హత్య చేశారని జన్ అధికార్ పార్టీ చీఫ్ పప్పు యాదవ్ సంచలన ఆరోపణ చేయడం సినీ వర్గాల్లో హాట్ ఇష్యూగా మారింది. అయితే గత కొంతకాలంగా సుశాంత్ డిప్రెషన్‌లో ఉండి ప్రాణాలు తీసుకున్నారని ప్రాథమిక విచారణలో వెల్లడి చేసిన ముంబై పోలీసులు.. ఈ ఆత్మహత్యపై పూర్తి దర్యాప్తు చేపడుతున్నారు. చుట్టుపక్కల వారిని అడిగి క్షుణ్ణంగా వివరాలు సేకరిస్తున్నారు.

'పవిత్ర రిష్ట' అనే టీవీ షోతో పాపులర్ అయిన సుశాంత్ ఆ తర్వాత క్రమంగా బాలీవుడ్‌లో అవకాశాలు అందిపుచ్చుకున్నారు. ‘ఎం.ఎస్.ధోనీ: ది అన్‌టోల్డ్ స్టోరీ’ సినిమాలో ధోనీ పాత్ర పోషించి స్టార్ స్టేటస్ పొందాడు. చివరగా ‘చిచ్చోర్’ సుశాంత్ చిత్రంలో కనిపించాడు.