సిక్కోలు ఎంపీ రిసెప్షన్‌లో ‘సింహా’ సందడి!

శ్రీకాకుళం ఎంపీ కింజరపు రామ్మోహన్‌నాయుడు రిసెప్షన్‌ ఆదివారం టెక్కలిలోని నిమ్మాడలో అంగరంగ వైభవంగా జరిగింది. ఈ వివాహ విందు కార్యక్రమానికి సినీ నటుడు, హిందూ పురం ఎమ్మెల్యే బాలకృష్ణ హాజరుకావడంతో సందడిగా మారింది. ఉత్తరాంధ్ర నుండి రామ్మోహన్‌నాయుడు, శ్రీశ్రావ్య వివాహ విందుకు పెద్దఎత్తున జనం తరలివచ్చి నూతన దంపతులకు ఆశీర్వచనాలను అందజేశారు.

ఇటీవల రామ్మోహన్‌నాయుడు, శ్రీశావ్య వివాహం ఏయూ ఇంజినీరింగ్ కాలేజీ గ్రౌండ్‌లో వైభవంగా వివాహం జరిగిన సంగతి తెలిసిందే.. కాగా ఆదివారం వివాహ విందు కార్యక్రమాన్ని ఏర్పాటు చేశారు. సుమారు ఆరు కౌంటర్లలో వివిధ రకాల వంటకాలను వడ్డించారు. ప్రముఖ సినీ సంగీత దర్శకుడు వందేమాతరం శ్రీనివాస్‌ సంగీత విభావరి ప్రత్యేక ఆకర్షణగా నిలిచింది. ఈ కార్యక్రమానికి మంత్రులు, ప్రజాప్రతినిధులు, అధికారులు, తెదేపా నాయకులు, కార్యకర్తలు, అభిమానులు తరలివచ్చారు.