భారతీయ సినిమా రికార్డులు బద్దలుకొట్టిన బాహుబలి-2

గురువారం విడుదలైన బాహుబలి-2 ట్రైలర్ యూట్యూబ్ రికార్డులు తిరగరాస్తోంది. రిలీజ్ అయిన 8 గంటల్లోనే కోటి వ్యూస్ మార్కు దాటగా, 24 గంటలు గడిచేసరికి 50 మిలియన్ల వ్యూస్ సాధించి.. సరికొత్త రికార్డు నెలకొల్పింది. ఒక్క రోజులోనే ఈ సినిమా ట్రైలర్‌ను ఫేస్‌బుక్, యూట్యూబ్‌లలో 5 కోట్ల మంది వీక్షించడం సినీ విశ్లేషకులను సైతం ఆశ్చర్యానికి గురి చేసింది. 24 గంటల్లో అత్యధిక మంది వీక్షించిన భారతీయ సినిమా ట్రైలర్‌గా రాజమౌళి సినిమా రికార్డు క్రియేట్ చేసింది. ఈ ట్రైలర్‌ను తెలుగు, తమిళం, హిందీ, మలయాళం భాషల్లో విడుదల చేశారు.

ఈ సందర్భంగా దర్శకధీరుడు రాజమౌళి ఫేస్‌బుక్ ద్వారా హర్షం వ్యక్తం చేశారు. వాట్సాప్‌లోనూ బాహుబలి ట్రైలర్ వైరల్‌‌గా మారిందని, విడుదలకు ముందు దీన్ని ఊహించలేకపోయామని రాజమౌళి తెలిపారు. ఫ్రెండ్స్, ఫ్యాన్స్, శ్రేయోభిలాషుల నుంచి అభినందనలు వెల్లువెత్తుతున్నాయని చెప్పారు. ఇంతలా ఆదరించిన ప్రేక్షకులకు థ్యాంక్స్ అనేది చిన్నమాటే అవుతుందన్నారు. బిజినెస్ వ్యవహారాలను పర్యవేక్షిస్తున్న కార్తికేయ, ఆర్కా మీడియాకు చెందిన వంశీ అట్లూరి ఈ ట్రైలర్‌ను ఎడిట్ చేశారని చెప్పిన దర్శకధీరుడు వారిపై ప్రశంసల జల్లు కురిపించాడు.

50 Million cumulative views of our trailer, across all languages, on YT & FB. The most viewed Indian movie trailer in 24hours. #BB2Storm pic.twitter.com/BPSwQbTzzb — rajamouli ss (@ssrajamouli) March 17, 2017
వాస్తవానికి ఈ ట్రైలర్‌ను గురువారం సాయంత్రం 5 గంటల సమయంలో ఫేస్‌బుక్ ద్వారా విడుదల చేద్దామని భావించారు. ఆ విషయాన్నే మీడియాకు కూడా చెప్పారు. కానీ ఫేస్‌బుక్‌లో తలెత్తిన బగ్ కారణంగానే ట్రైలర్ ఉదయాన్నే విడుదలైందని రాజమౌళి స్పష్టం చేశారు. ఓరకంగా ఎఫ్‌బీ బగ్ బాహుబలి బృందానికి మేలు చేసిందేమో.

2015 జూన్ 1న టి-సిరీస్ పోస్ట్ చేసిన ‘బాహుబలి: ది బిగినింగ్’ ట్రైలర్‌ను ఇప్పటి వరకు కోటిన్నర మందికిపైగా మంది చూశారు. అలాంటిది విడుదలైన 24 గంటల్లోనే ‘బాహుబలి 2’ ట్రైలర్ వ్యూస్ 5 కోట్లు దాటాయంటే ఈ సినిమాపై ప్రేక్షకుల అంచనాలు ఏ రేంజ్‌లో ఉన్నాయో అర్థమవుతోంది. ‘బాహుబలి 2: ది కన్‌క్లూజన్’ మూవీ ఏప్రిల్ 28న ప్రేక్షకుల ముందుకు రానుంది. ట్రైలర్ వ్యూస్‌ను బట్టి చూస్తే.. రెండో భాగం ఇంకే రేంజ్‌లో ఉండనుందో అర్థం చేసుకోవచ్చు.