సీఎం చంద్రబాబుపై సినిమా 'చంద్రోదయం'

ఆంధ్రప్రదేశ్ ముఖ్యమంత్రి నారా చంద్రబాబు నాయుడు తెలుసా? అరె.. తొమ్మిదేళ్లు ఉమ్మడి రాష్ట్ర సీఎంగా చేశారు, ఇప్పుడు నవ్యాంధ్ర ప్రదేశ్ తొలి సీఎం, ప్రస్తుతం అమరావతి నిర్మాత ఆయన తెలీకపోవడం ఏమిటి అంటారా? ఏపి సీఎం చంద్రబాబు గురించి అందరికీ తెలిసిందే అయితే చంద్రబాబు ప్రజలకు ఏ విధంగా చేరువయ్యారు? ప్రజలకు ఆయన ఎంత సేవ చేశారు.. అనేది ఇతివృత్తంగా తీసుకొని 'చంద్రోదయం' అనే సినిమా తెరకెక్కబోతోంది. శ్రీ శ్వేతార్క గణపతి ఎంటర్‌ప్రైజెస్‌ ఫిల్మ్స్ సమర్పించు 'చంద్రోదయం' సినిమా త్వరలో తెరకెక్కిస్తున్నారు. డివివి సాయికుమార్, పసుపులేటి వెంకటరమణ సంయుక్త నిర్మాణంలో దర్శకుడు పసుపులేటి వెంకటరమణ ఈ చిత్రాన్ని రూపొందిస్తున్నారు. ఇటీవలే ఈ చిత్ర బ్రోచర్‌ను హోం మినిస్టర్‌ నిమ్మకాయల చినరాజప్ప ఆవిష్కరించారు. ఆగస్ట్‌ 4న ఒంగోలులో ఆంధ్రప్రదేశ్‌కి చెందిన పలువురు రాజకీయ ప్రముఖుల సమక్షంలో 'చంద్రోదయం' సినిమా షూటింగ్ ప్రారంభంకానుంది. ఈ చిత్రంలో కార్తీక్‌, పల్లవి శ్రేష్ట, అభిషేక్‌, శ్రీదేవి, రవివర్మ, పూజిత, సానిత, వర్ష, హరీష్‌, మలినేని లక్ష్మయ్య, హేమసుందర్‌ తదితరులు నటిస్తున్నారు. మొత్తానికి చంద్రబాబు కూడా తెరమీద తన బావమరిది బాలయ్యకు పోటీగా వచ్చేసి ఆ విధంగా ముందుకు పోతున్నారు. మరి చూడాలి చంద్రబాబు పాత్రలో నటించే వ్యక్తి ఎలా మెప్పిసారో అనేది.