కోలీవుడ్‌కు వెళ్తున్న మరో తెలుగుహీరో!

తమిళ చిత్రపరిశ్రమపై తెలుగు హీరోల దండయాత్రలు కొనసాగుతున్నాయి. ఇప్పటికే చాలా మంది తెలుగు హీరోల సినిమాలు తమిళంలోకి అనువాదమై విడుదల అవుతున్నాయి. ఇక కొందరి సినిమాలు తెలుగు, తమిళ సినిమాలుగా.. బై లింగ్వల్స్ గా రూపొందుతున్నాయి. నిన్ననే విడుదల అయిన ‘స్పైడర్’ కూడా తెలుగు, తమిళ భాషల్లో రూపొందిందని ప్రత్యేకంగా చెప్పనక్కర్లేదు. మరి ఈ క్రమంలో మరో టాలీవుడ్ హీరో తమిళ చిత్ర పరిశ్రమకు పరిచయం కాబోతున్నాడని తెలుస్తోంది. ఈ సారి మరెవరో కాదు.. సాయికుమార్ తనయుడు ఆది.

‘ప్రేమకావాలి’ సినిమాతో టాలీవుడ్ కు పరిచయం అయిన ఆది సరైన హిట్ కొట్టే ప్రయత్నాల్లో ఉన్నాడు. ఈ నేపథ్యంలో ఇతడికి ఒక తమిళ చిత్రంలో అవకాశం వచ్చినట్టుగా తెలుస్తోంది. డీకే దర్శకత్వంలో రూపొందుతున్న ‘కాట్టేరి’ అనే సినిమాతో ఆది తమిళానికి పరిచయం అవుతున్నాడు. ఇప్పటికే ఈ సినిమా ఫస్ట్ లుక్ ను కూడా విడుదల చేశారు. ఇందులో ఆది సరసన ఓవియా నటించబోతోందని సమాచారం.

ఇదొక హారర్ జోనర్ సినిమా అని తెలుస్తోంది. ఈ సినిమాను ప్రముఖ తమిళ నిర్మాత జ్ఞాన‌వేల్ రాజా నిర్మిస్తున్నాడని తెలుస్తోంది. ఆసక్తికరమైన విషయం ఏమిటంటే..దీంతో పాటు మరో తమిళ సినిమాలో కూడా ఆది నటించబోతున్నాడట. దానికి కూడా జ్ఞాన‌వేల్ రాజా నే నిర్మాతగా వ్యవహరించబోతున్నట్టు సమాచారం. అదొక కామెడీ డ్రామా అని విజయ్ వరదరాజ్ ఆ సినిమాకు దర్శకత్వం వహిస్తాడని తెలుస్తోంది.