ఆమె పెళ్లి కోసం 3 రోజులు సెలవు పెట్టిన అమీర్ ఖాన్

ప్రస్తుతం దంగల్ మూవీ ప్రొడక్షన్ వర్క్‌తో బిజీగా వున్న అమీర్ ఖాన్ ఓ అమ్మాయి పెళ్లికి హాజరవడం కోసం మూడు రోజులపాటు సెలవు తీసుకుంటున్నాడు. అమీర్ ఖాన్ అంత ప్రాధాన్యత ఇస్తున్న ఆ అమ్మాయి ఎవరో కాదు... దంగల్ మూవీ ఎవరి రియల్ లైఫ్ ఆధారంగానైతే తెరకెక్కుతుందో అతడి కూతురే. అవును హర్యానాకు చెందిన మహావీర్ ఫోగట్ కూతురు, భారత స్టార్ రెజ్లర్ గీతా ఫోగట్ పెళ్లి కోసమే అమీర్ ఖాన్ ఈ సెలవులు తీసుకుంటున్నాడు.

రెజ్లర్ పవన్ కుమార్‌తో నవంబర్ 20న గీతా పెళ్లి జరగనుంది. దంగల్ మూవీ కారణంగా గీతాతో అమీర్ ఖాన్‌కి మంచి అనుబంధం ఏర్పడింది. గీతాని తన కూతురిలానే భావించే అమీర్ ఖాన్ ఆమెకి అద్దిరిపోయే కానుక ఇవ్వనున్నాడు. పెళ్లిరోజున గీతా ధరించబోయే వెడ్డింగ్ ఔట్‌ఫిట్‌ని అమీర్ ఖాన్ బహుమతిగా అందించనున్నట్టు తెలుస్తోంది.

హర్యానాలో జరగనున్న ఈ వివాహవేడుకకి హాజరు కావాల్సిందిగా అమీర్ ఖాన్‌తో పాటు దంగల్ డైరెక్టర్ నీతేష్ తివారికి కూడా ఆహ్వానం అందింది. ఈ వివాహ వేడుకలో జరిగే ప్రతీ కీలక ఘట్టాన్ని దగ్గరుండి తిలకించేందుకు అమీర్ ఈ మూడు రోజులపాటు అక్కడే వుండనున్నట్టు సమాచారం.