అభిమానిపై ఈ హీరో దాడి చేశాడా ?

ప్రముఖ బాలీవుడ్ నటుడు అర్జున్ రాంపాల్ తనపై దాడి చేసి, వేధింపులకి పాల్పడ్డాడు అంటూ ఢిల్లీలో శోభిత్ అనే ఓ యువకుడు పోలీసులకి ఫిర్యాదు చేశారు. నైట్ క్లబ్‌లో అర్జున్ రాంపాల్‌తో కలిసి ఫోటో తీసుకునేందుకు యత్నించగా అందుకు సీరియస్ అయిన నటుడు అదే కెమెరా తీసుకుని అతడిపై విసిరికొట్టినట్టు తెలుస్తోంది. ఈ ఘటనలో గాయపడిన అభిమాని శోభిత్ అర్ధరాత్రి 2:30 గంటల ప్రాంతంలోనే ఢిల్లీ పోలీసులకి ఫిర్యాదు చేశారు.

శోభిత్ ఫిర్యాదు మేరకు, పార్టీ జరిగిన క్లబ్బులోని సీసీటీవీ ఫుటేజ్ స్వాధీనం చేసుకున్న పోలీసులు ప్రస్తుతం ఘటనపై దర్యాప్తు చేస్తున్నట్టు తెలిపారు. సీసీటీవీ ఫుటేజీ పరిశీలించిన అనంతరం ఒకవేళ అర్జున్ రాంపాల్ నిజంగానే ఈ దాడికి పాల్పడినట్టుగా నిర్ధారణ అయితే, అప్పుడు నటుడిపై ఎఫ్ఐఆర్ నమోదు చేస్తామని పోలీసులు చెబుతుండగా... అతడిపై కేసు నమోదు చేసే వరకు తాము ఇక్కడి నుంచి ఇంటికి వెళ్లం అని బాధితుడు కూడా స్టేషన్‌లోనే బైటాయించాడు.