చలపతి మరోసారి.. ‘అమ్మాయిలకు ఓణీ ఉన్నది ఎందుకు’?

‘అమ్మాయిలు మగాళ్ల పక్కలోకి పనికొస్తారంటూ’ సంచలన కామెంట్స్ చేసి తీవ్ర విమర్శలు పాలైన సీనియర్ నటుడు చలపతిరావు తన తీరు మార్చుకోలేదు. టాలీవుడ్‌ సీనియర్ నటుల్లో ఒకరైన చలపతిరావు వ్యాఖ్యలపై అప్పట్లో పెద్ద దుమారమే రేగింది. పోలీస్ స్టేషన్.. కేసులు.. విమర్శలతో చేసేది లేక తప్పైపోయిందని లెంపలేసుకున్నారు ఈ పెద్దాయన. అయితే ఎలాంటి వివాదాల జోలికైతే పోడని ప్రేక్షకులు భావించారో మళ్లీ అలాంటి వ్యాఖ్యలే చేసి మరోసారి వార్తల్లో నిలిచారు. ఇటీవల ఓ ప్రైవేటు చానల్‌కు ఇచ్చిన ఇంటర్వ్యూలో ఈకాలం అమ్మాయిల వస్త్రధారణపై సంచలన కామెంట్స్ చేశారు.

ఆడపిల్లలు ఈకాలంలో ఫ్యాంటు, టీషర్టులో వేసుకుంటే తప్పని నేను అనడం లేదని.. అమ్మాయిలకు 13-14 ఏళ్లు వచ్చేసరికి ఓణీలు ఇస్తారని అయితే ఆ ఓణీ పర్పస్ ఏంటో తెలుసుకోలేని స్థితిలో ఇప్పుడు అమ్మాయిలు ఉన్నారన్నారు. ఒక వయస్సుకు వచ్చేసరికి అమ్మాయిల ఎద కనిపించకుండా ఓణీ ఇస్తారని.. అయితే ఆ ఓణీని తలకు మెడకు చుట్టుకుంటున్నారని ఇలాంటి వారికి ఏం చెప్పాలో తనకు అర్థం కావడం లేదన్నారు.

అయితే కాలంతో పాటు మనమూ ఎంజాయ్ చేయడమే తప్ప చేసేదేం లేదని, ఒకవేళ ఇది తప్పు అని చెప్పినా చాదస్తపరుడు.. ముసలోడు.. అంటారు. అందుకే మనకెందుకులే వాళ్ల కర్మ వాళ్లు పడతారు.. అనుభవించనీ అని వదిలేస్తున్నా. అమ్మాయిలు ఓణీని మెడకో తలకో చుట్టుకుని వెళ్లినపుడు కుర్రాడు ఏదో అంటాడు. కామెంట్ చేస్తాడు. అన్నపుడు పడాలి. తప్పదు. ఓపిక ఉంటే పడాలి. లేదా దెబ్బలాడాలి. ఎంతమందితో ఆడతావు? దెబ్బలాడుతూ పోతే జీవితాంతం దెబ్బలాడాల్సిందే. పద్ధతైనా మార్చుకోవాలి. లేదా వాళ్లేమన్నా కూడా పడాలన్నారు.

ఒకవేళ చీరకట్టుకున్నా కామెంట్ చేస్తున్నారు కాదా అని యాంకర్ అడిగితే.. అంటారండీ!! ఇది ప్రజాస్వామ్య దేశం, ఎవడైనా ఏమైనా అంటాడు, అందుకే మన జాగ్రత్తలో మనం ఉండాలి. అలా ఉంటే ఎవడూ మనజోలికి రాడు, మనల్ని ఎవడూ ఏమీ అనడని మరోసారి ఆడవాళ్ల వస్త్రధారణ విషయంలో తన వెర్షన్‌ను వినిపించారు సీనియర్ నటుడు చలపతిరావు.

అయితే ఇది ఆయన వ్యక్తిగత అభిప్రాయమే అయినప్పటికీ చలపతిరావు చెప్పింది కరెక్టే కదా అనేవారు కొందరైతే.. ఒకరి ఇష్టాఇష్టాలపై ఈయన ఎలా కామెంట్ చేస్తారనేవారూ లేకపోలేదు.