‘చిరంజీవి’ పేరులోని చివరి రెండు అక్షరాలే..!

సినీ పరిశ్రమకు కావాలని రాలేదని, బంధువైన దాసరి నారాయణరావు నటించాలని కోరడంతో కాదనలేకే వచ్చానని నటుడు జీవీ సుధాకర్‌ నాయుడు తెలిపారు. తూర్పు గోదావరి జిల్లా ద్రాక్షారామంలో శనివారం (నవంబర్ 25) ఓ కార్యక్రమంలో పాల్గొనడానికి విచ్చేసిన జీవీ మీడియాతో మాట్లాడుతూ.. పలు ఆసక్తికర వివరాలు వెల్లడించారు. ‘నాకు చిరంజీవి అంటే చాలా అభిమానం ఉండేది. ఈ విషయం తెలిసిన దాసరి.. ఆయన పేరులోని చివరి రెండు అక్షరాలైన ‘జీవి’ని నా పేరు ముందు కలిపారు. దీంతో అదే నా పేరుగా స్థిరపడిపోయింది’ అని ఆయన చెప్పారు. అంతఃపురం సినిమా ద్వారా తనకు మంచి గుర్తింపు వచ్చిందని, ఆ తర్వాత మంచి పాత్రలు పోషించానని జీవీ చెప్పుకొచ్చారు.

ఆంధ్రప్రదేశ్ ప్రభుత్వం ఇటీవల ప్రకటించిన నంది అవార్డులపై కూడా జీవీ స్పందించారు. చిత్ర పరిశ్రమను, నంది అవార్డులను ‘ఎల్లో’గా మార్చేశారని ఆయన విమర్శించారు. విజయవాడలో ఇటీవల జరిగిన బోటు ప్రమాదంపై స్పందిస్తూ... బోటు యజమాని రాష్ట్ర మంత్రి కావడంవల్లే ఆ విషయాన్ని తొక్కేశారని వ్యాఖ్యానించారు.

హైదరాబాద్‌లో 100 మంది పేద ముస్లిం పిల్లలను స్నేహితులతో కలసి పదేళ్లుగా చదివిస్తున్నానని జీవీ చెప్పారు. ఈ అంశంపై ఏనాడూ ప్రచారం చేసుకోలేదని ఆయన అన్నారు. తానే నిర్మాతగా, స్వీయ దర్శకత్వంలో వంగవీటి సినిమా తీస్తానని జీవీ చెప్పారు.