Raghava Lawrence: పాదాలపై పడి సేవ చేస్తా.. మార్పుకు శ్రీకారం చుట్టిన రాఘవ లారెన్స్

ఎన్నో సేవా కార్యక్రమాలు చేస్తూ.. ఎంతోమంది అనాథలకు అండగా నిలబడుతూ గొప్ప మనసు చాటుకుంటున్నారు కొరియోగ్రాఫర్, నటుడు రాఘవ లారెన్స్ (Raghava Lawrence). అయితే ఇక నుంచి తాను ఎవరికీ సాయం చేసినా.. వాళ్లు తనపై కాళ్లపై పడకూడదని.. తానే వారి పాదాలపై పడి సేవ చేస్తానని చెప్పారు. ఈ మేరకు ఆయన సోషల్ మీడియాలో ఓ పోస్ట్ పెట్టారు. 'నా జీవితంలో ఇది ఒక మార్పు. ఇక నుంచి నేను ఎవరికి సహాయం చేసినా.. వాళ్లు నా పాదాలపై పడకూడదని భావిస్తాను. వారి పాదాలపై పడి నా సేవ చేస్తాను.

నాలో ఈ ఒక్క చిన్న మార్పు తీసుకురావాలని చాలా కాలంగా ఎదురు చూస్తున్నాను. ఆ దిశగా ఈరోజే తొలి అడుగు వేస్తాను. ఇప్పటివరకు ధనవంతుల కాళ్లపై పడి పేదలు సాయం కోరడం చూశాను. ఇక నుంచి నేను ఇలాంటి సంఘటనలు చూడాలని అనుకోవట్లేదు. నా జీవితంలో జరిగిన కొన్ని సంఘటనలే ఇందుకు కారణం. నేను వాటిని మీ అందరితో పంచుకోవాలనుకుంటున్నాను.

ఒక కుటుంబం తమ బిడ్డకు గుండె శస్త్రచికిత్స సహాయం కోసం నా వద్దకు వచ్చింది. నా కాళ్లపై పడి సాయం అడిగారు. నేను వెంటనే దూరంగా వెళ్లి.. సహాయం అవసరమైన పిల్లవాడిని చూశాను. తల్లిదండ్రులు నా పాదాలపై పడటంతో ఆ పిల్లవాడు వెంటనే ఏడుపు ప్రారంభించాడు. తల్లిదండ్రులు ఎవరి కాళ్లపై అయినా పడితే పిల్లలకు నచ్చదు. పిల్లలందరూ తమ తండ్రిని హీరోగా చూస్తారు. వాళ్ల దగ్గర డబ్బు లేకపోవడంతో నా కాళ్లపై పడడంతో నేను తట్టుకోలేను. అది నన్ను చాలా బాధించింది.

అందుకే ఇక నుంచి నేను ఓ నిర్ణయానికి వచ్చాను. సాయం అడిగిన వాళ్లకు మనం డబ్బు మాత్రమే ఇస్తున్నాం.. అయితే డబ్బు ఇచ్చి దేవుళ్లు కాలేము. ఇక నుంచి నేను సహాయం చేసేవారి పాదాల చెంతకు నేను వెళతాను. మార్పు నా నుంచే ప్రారంభం కావాలి. ఇందుకు మీ అందరి మీ దీవెనలు కావాలి. ఇందుకు సంబంధించిన వీడియోను త్వరలో విడుదల చేస్తాను..' అంటూ ఆయన రాసుకొచ్చారు. ఓ బాలుడిపై కాళ్లకు నమస్కరించిన ఫొటోను షేర్ చేసుకున్నారు. రాఘవ లారెన్స్ చేస్తున్న మంచి పనికి సోషల్ మీడియాలో ప్రశంసల వర్షం కురుస్తోంది.