హైవేపై పల్టీలు కొట్టిన కారు.. హేమంత్‌కు తప్పిన ముప్పు

రేడియో జాకీ నుంచి యాంకర్‌గా, నటుడిగా ఎదిగిన హేమంత్ తెలుగు ప్రేక్షకులకు సుపరిచితుడే. తాజాగా ‘మహర్షి’ సినిమాలో మహేష్‌ బాబుకు ఎంటెక్ క్లాస్‌మేట్‌గా హేమంత్ నటించారు. ‘మహర్షి’ సక్సెస్‌ఫుల్ జర్నీలో భాగమయ్యారు. ప్రస్తుతం యాంకర్‌గా, నటుడిగా రాణిస్తోన్న హేమంత్ శనివారం రాత్రి పెద్ద ప్రమాదం నుంచి సురక్షితంగా బయటపడ్డారు. ఆయన ప్రయాణిస్తోన్న కారు విజయవాడ-హైదరాబాద్ హైవేపై ప్రమాదానికి గురైంది. అదృష్టవశాత్తు ఈ ప్రమాదం నుంచి హేమంత్ ప్రాణాలతో బయటపడ్డారు.

శనివారం విజయవాడలో ‘మహర్షి’ విజయోత్సవ వేడుకను నిర్వహించారు. మహేష్ బాబు, అల్లరి నరేష్, దర్శకుడు వంశీ పైడిపల్లి, నిర్మాతలు దిల్ రాజు, ప్రసాద్ వి. పొట్లూరి, అశ్వినీదత్ తదితరులు పాల్గొన్న ఈ కార్యక్రమానికి హేమంత్ వ్యాఖ్యాతగా వ్యవహరించారు. అయితే వేడుక ముగిసిన త‌ర్వాత కారులో హైద‌రాబాద్‌కి హేమంత్ తిరుగు ప్రయాణం కాగా.. కృష్ణా జిల్లా జగ్గయ్యపేట మండలం మహమ్మద్ క్రాస్ రోడ్డు వద్ద కారు ప్రమాదానికి గురయ్యింది.

రోడ్డుపై అకస్మాత్తుగా గేదె ప్రత్యక్షం కావడంతో దానిని తప్పించబోయి కారు అదుపు తప్పింది. పల్టీలు కొట్టి తలక్రిందులుగా రోడ్డుపై ఆగిపోయింది. ఈ ప్రమాదంలో హేమంత్ స్వల్ప గాయాల‌తో బ‌య‌ట‌పడ్డారు. ప్రమాదం జ‌రిగిన సమ‌యంలో ఆయనే కారు నడుపుతున్నట్లు స‌మాచారం. పోలీసులు కారును పరిశీలించి స్టేషన్‌కు తరలించారు. పూర్తి వివరాలు తెలియాల్సి ఉంది.