నటుడు శివాజీ రాజాకు గుండెపోటు

టాలీవుడ్ సీనియర్ నటుడు శివాజీ రాజా గుండెపోటుకు గురయ్యారు. మంగళవారం రాత్రి ఆయనకు అకస్మాత్తుగా గుండెపోటు రావడంతో కుటుంబ సభ్యులు హుటాహుటిన ఆయన్ని స్టార్ హాస్పిటల్‌కు తరలించారు. ప్రస్తుతం ఆయనకు వైద్యులు చికిత్స అందిస్తున్నారు. బీపీ డౌన్ కావడంతో శివాజీ రాజాకు గుండెపోటు వచ్చిందని ఆయన స్నేహితుడు, నిర్మాత సురేష్ కొండేటి వెల్లడించారు. శివాజీ రాజాకు స్టంట్ వేస్తారని సురేష్ చెప్పారు.

ప్రస్తుతం శివాజీ రాజా వయసు 58 సంవత్సరాలు. 400కు పైగా సినిమాల్లో ఆయన నటించారు. కమెడియన్‌గా, క్యారెక్టర్ ఆర్టిస్టుగా మంచి గుర్తింపు తెచ్చుకున్నారు. అలాగే, టీవీ సీరియల్స్‌లోనూ నటించారు. ‘అమృతం’, ‘ఆలస్యం అమృతం విషం’, ‘మిస్టర్ రోమియో’, ‘పండు మిరపకాయ్’, ‘పాపం పద్మనాభం’, ‘మొగుడ్స్ పెళ్లామ్స్’ సీరియల్స్‌తో బుల్లితెర ప్రేక్షకులను సైతం శివాజీ రాజా మెప్పించారు. క్యారెక్టర్ ఆర్టిస్టుగా నాలుగు నంది అవార్డులు అందుకున్నారు.

గడిచిన ఐదేళ్లలోనూ శివాజీ రాజా మంచి పాత్రలు చేశారు. ‘శ్రీమంతుడు’, ‘నక్షత్రం’, ‘నేనే రాజు నేనే మంత్రి’, ‘మెంటల్ మదిలో’, ‘జై సింహా’, ‘ఎంఎల్ఏ’, ‘అమ్మమ్మగారిల్లు’, ‘నర్తనశాల’, ‘బ్రోచేవారెవరురా’ చిత్రాల్లో శివాజీ రాజా నటించారు. 2017లో మూవీ ఆర్టిస్ట్ అసోసియేషన్ (మా) అధ్యక్షుడిగా శివాజీ రాజా ఏకగ్రీవంగా ఎన్నికయ్యారు. రెండేళ్ల పాటు ఆ పదవిలో కొనసాగారు. నటుడిగా అద్భుతమైన కెరీర్‌ను కొనసాగించిన శివాజీ రాజా అకస్మాత్తుగా గుండెపోటుకు గురికావడం బాధాకరం. ఆయన త్వరగా కోలుకోవాలని ఆ దేవుడిని ప్రార్థిద్దాం.