హీరోయిన్ ఆత్మహత్య.. ఆ హీరో నిందితుడే!

నటి జియా ఖాన్ ఆత్మహత్య కేసు మరో మలుపు తిరిగింది. ఐదేళ్లుగా విచారణలో ఉన్న ఈ కేసులో బాలీవుడ్ నటుడు సూరజ్ పంచోలీ నిందితుడే అని ముంబై సెషన్స్ కోర్టు స్పష్టం చేసింది. ఈ మేరకు ఆమె ఆత్మహత్యకు కారణమయ్యాడని, అతడిపై ఐపీసీ సెక్షన్ 306 కింద కేసును నమోదు చేయాలని కోర్టు ఆదేశించింది. జియా ఖాన్ ఆత్మహత్యలో సూరజ్ అనుమానాస్పద పాత్రను కోర్టు ధ్రువీకరించింది. అతడిపై కేసు నమోదు చేయాలని స్పష్టం చేసింది.

రామ్ గోపాల్ వర్మ తీసిన ‘నిశ్శబ్ద్’ సినిమాతో సంచలనంగా నిలిచింది జియాఖాన్. నటిగా ప్రతిభావంతమైన ఆమెకు వివిధ సినిమాల్లో అవకాశాలు వచ్చాయి. అదే సమయంలో బాలీవుడ్ నటుడు ఆదిత్య పంచోలీ తనయుడితో ఆమెకు ప్రేమయాణం మొదలైంది. కొంత కాలం ఆ ప్రేమకథ నడిచిన తర్వాత సూరజ్ తో ఆమె విడిపోయింది. ఆ దశలోనే.. ఆమె ఉరి వేసుకుని ఆత్మహత్య చేసుకుంది. ఆమె ఆత్మహత్యకు కారణం సూరజ్ పంచోలీనే అనే ఆరోపణలు గుప్పుమన్నాయి.

అయితే ఈ కేసులో సూరజ్ ను నిందితుడిగా చేర్చేందుకు కచ్చితమైన ఆధారాలు కనిపించడం లేదని సీబీఐ అధికారులు తెలుపుతూ వచ్చారు. దీనీపై జియా ఖాన్ తల్లి కోర్టుకెక్కింది. సుదీర్ఘ విచారణ అనంతరం సూరజ్ ను నిందితుడిగా చేర్చాలని న్యాయస్థానం ఆదేశించింది. అయితే ఈ కేసుతో తనకు ప్రమేయం లేదని.. తను నిరపరాధిని అని సూరజ్ కొన్నాళ్ల కిందట ఒక పిటిషన్ దాఖలు చేశాడు. అది ఫిబ్రవరి 14వ తేదీన విచారణకు రానున్నదని తెలుస్తోంది.