ఆ ప్రేమ మాటల్లో చెప్పలేనిది.. సుమలత భావోద్వేగ పోస్ట్

అంబరీష్‌కు ఘనంగా వీడ్కోలు చెప్పిన అభిమానులు, కర్ణాటక ప్రజలకు తాను, తన కుమారుడు ఎల్లప్పుడూ రుణపడి ఉంటామని ఆయన సతీమణి, నటి సుమలత అన్నారు. కష్ట సమయంలో తమ కుటుంబానికి అండగా నిలిచిన వారందరికీ ఆమె ధన్యవాదాలు చెప్పారు. ప్రముఖ నటుడు, కన్నడ రెబల్ స్టార్ అంబరీష్ అనారోగ్య కారణాలతో నవంబర్ 26న కన్నుమూసిన సంగతి తెలిసిందే. అంబరీష్ అంత్యక్రియలను ప్రభుత్వ లాంఛనాలతో నిర్వహించారు. ఆయన అంత్యక్రియలకు సినీ, రాజకీయ ప్రముఖులు, అభిమానులు భారీగా తరలివచ్చారు. వారందరికీ ధన్యవాదాలు తెలుపుతూ సుమలత ట్విటర్‌లో పోస్ట్‌ చేశారు.

‘అంబరీష్ ఓ నటుడు, సూపర్‌ స్టార్‌, కేంద్ర మంత్రి, రాష్ట్ర కేబినెట్ మంత్రి. మంచి స్నేహితుడు. అన్నింటికీ మించి మీ స్వచ్ఛమైన ప్రేమను పొందిన వ్యక్తి. ఆయన ఈ పుణ్యభూమి కర్ణాటకలో పుట్టే అదృష్టం చేసుకున్నారు. ఆయన మాండ్యకు కుమారుడి లాంటి వారు’ అంటూ సుమలత పేర్కొన్నారు. అంబరీష్ మృతి తర్వాత ఆమె తొలిసారిగా స్పందిస్తూ భావోద్వేగపూరిత ట్వీట్లు చేశారు.


‘చీకటితో కూడిన ఈ బాధాకర సమయంలో మీరు చూపిన ప్రేమ, సానుభూతి మాకు ధైర్యాన్ని ఇచ్చాయి. అంబరీష్‌కు ఘనంగా వీడ్కోలు చెప్పిన కర్ణాటక ప్రజలకు, అభిమానులకు నేను, నా కుమారుడు అభిషేక్ ఎల్లప్పుడూ రుణపడి ఉంటాం. ఆయణ్ని (అంబరీశ్‌) గౌరవిస్తూ ప్రభుత్వ లాంఛనాలతో అంత్యక్రియలు ఏర్పాటు చేసిన కర్ణాటక ప్రభుత్వానికి, ముఖ్యమంత్రికి కృతజ్ఞతలు. ప్రతి ఒక్కరికీ హృదయపూర్వక ధన్యవాదాలు’ అని సుమలత వరస ట్వీట్లు చేశారు.


పోలీసు అధికారులు, ఇతర అధికారులు, ప్రత్యేకంగా మాండ్య ప్రజలకు సుమలత ధన్యవాదాలు తెలిపారు. ‘అంతిమ వీడ్కోలు సమయంలో ఎలాంటి అవాంతరాలు జరగకుండా ఉండటానికి వరసగా మూడు రోజులు పోలీసు అధికారులు, జిల్లా అధికారులు చాలా కష్టపడ్డారు. అంబరీష్‌ను అమితంగా అభిమానించిన మాండ్య ప్రజల ప్రేమ మాటల్లో చెప్పలేనిది’ అని ఆమె రాసుకొచ్చారు.



అంబరీష్ మృతి పట్ల దక్షిణాది సినీ పరిశ్రమలకు చెందిన దిగ్గజ నటీనటులంతా సంతాపం తెలిపారు. సుమలతను, ఆమె కుమారుడు అభిషేక్‌ను ఓదార్చారు. చిరంజీవి, మోహన్‌ బాబు, రజినీకాంత్‌ తదితరులు అంబరీష్‌కు నివాళులు అర్పించిన వారిలో ఉన్నారు.