ఆ ఎమ్మెల్యే వేధిస్తున్నాడు.. అందుకే, నటించడం లేదు: నటి అపూర్వ

ఆ ఎమ్మెల్యే తమకు నరకం చూపిస్తున్నాడని, మళ్లీ అతనే ఎమ్మెల్యేగా ఎన్నికైతే తమ ఆస్తులన్నీ అమ్ముకుని తెలంగాణ వెళ్లిపోతామని నటి అపూర్వ వెల్లడించారు. ఆమె ఓ ‘యూట్యూబ్’ చానెల్ ఇంటర్వ్యూలో మాట్లాడుతూ.. దెందులూరు ఎమ్మెల్యే చింతమనేని ప్రభాకర్‌పై ఆరోపణలు చేశారు. తాను సినిమాలకు దూరమవడానికి గల కారణాలు కూడా తెలిపారు.

తెలుగు రాష్ట్రాల్లోని రాజకీయాలపై తనకు అవగాహన ఉందని అపూర్వ తెలిపారు. దెందులూరులో తమది రాజకీయ నేపథ్య కుటుంబమని, తాము టీడీపీకి చెందినవాళ్లమని అన్నారు. 2014లో వైఎస్ జగన్ గెలిస్తే రాష్ట్రాన్ని కంట్రోల్ చేయలేడనే అనుమానం ఉండేదని అన్నారు. అయితే, విశాఖ విమానాశ్రయంలో దాడి జరిగిన సమయంలో జగన్ స్పందించిన తీరు చాలా ఉన్నతంగా ఉందన్నారు. ఉద్రిక్తతలు నెలకొనకుండా చిరునవ్వుతోనే కార్యకర్తలను పలకరించిన తీరు ఆకట్టుకుందన్నారు.

‘‘మాది కమ్మ కులమే. కానీ, నాకు కులగజ్టి లేదు. కులాన్ని పెద్దగా పట్టించుకోను. కానీ, టీడీపీకే ఓట్లు వేస్తున్నాం. రాష్ట్ర విభజన తర్వాత జరిగిన ఎన్నికల్లో చంద్రబాబు నాయుడు గెలవాలని దేవుడిని ప్రార్థించా. మా నియోజవర్గమైన దెందులూరులో చింతమనేని విజయం సాధిస్తే ఎంతో సంతోషించా. కానీ, తాము ఓట్లేసి గెలిపించిన ఆ ఎమ్మెల్యేనే ఇప్పుడు మాకు నరకం చూపిస్తున్నాడు’’ అని అపూర్వ అన్నారు. ఆయన వల్ల తాను ఎన్నో కష్టాలు పడ్డానని అన్నారు. వచ్చే ఎన్నికల్లో కూడా ఆయనే గెలుపొందితే తాను ఆస్తులు అమ్ముకుని తెలంగాణ వెళ్లిపోతానని అన్నారు. అక్కడ ప్రతి ఒక్కరికీ భద్రత ఉందని అన్నారు.

అందుకే సినిమాలు చేయడం లేదు: తన వ్యక్తిగత కారణాల వల్లే సినిమాలకు దూరంగా ఉన్నానని అపూర్వ తెలిపారు. ఆమె తల్లి గుండె జబ్బుతో బాధపడుతున్నారని, ఆమె బాగోగులు చూసుకునే బాధ్యత తనదే కావడంతో అవకాశాలు వస్తున్నా నటించడం లేదని చెప్పారు. తల్లి ఆరోగ్యం మెరుగుపడిన తర్వాత మళ్లీ సినిమాల్లోకి వస్తానని ఆమె తెలిపారు.