ఇండస్ట్రీ పెద్దలు నాపై కుట్ర పన్నారు: అవికా గోర్

ఇండస్ట్రీ పెద్దలు తనకు అవకాశాలు రాకుండా అడ్డుకుంటున్నారంటూ ఆరోపించింది హీరోయిన్ అవికా గోర్. చిన్నారి పెళ్లికూతురు సీరియల్‌తో గుర్తింపు తెచ్చుకున్న నటి అవికా గోర్ తెలుగులో 'ఉయ్యాలా జంపాలా' చిత్రంతో హీరోయిన్‌గా ఎంట్రీ ఇచ్చింది. ఆ తరువాత 'సినిమా చూపిస్తా మావా','ఎక్కడకి పోతావు చిన్నవాడా' వంటి చిత్రాల్లో నటించి మంచి పేరును సంపాదించుకుంది. అయితే ప్రస్తుతం ఆమెకు తెలుగులో ఒక్క అవకాశం కూడా చేతుల్లో లేదు. ఆమె తన చదువు కోసం గ్యాప్ తీసుకుందని, తెలుగు సినిమాలను వదిలేస్తుందనే ప్రచారం గతంలో జరిగింది.

ఈ వార్తలపై అవికా కాస్త ఘాటుగానే స్పందించింది. తనకు అవకాశాలకు ఎలాంటి కొరత లేదని, కాకపోతే కొందరు ఇండస్ట్రీ పెద్దలు తనకు అవకాశాలు రాకుండా బలవంతంగా అడ్డుకుంటున్నారని ఆమె తీవ్ర ఆరోపణలు చేసింది. తనకు అవకాశాలు ఇవ్వకూడదని ఆ ఇండస్ట్రీ పెద్దలు దర్శకనిర్మాతలకు సూచిస్తున్నారని అవికా స్పష్టం చేసింది. తాను సినిమాలకు దూరమయ్యే అవకాశాలు లేవని తెలిపారు. అయితే వారు ఎవరు? ఎందుకు ఇలా చేస్తున్నారనే? విషయాలపై ఆమె మాట్లాడలేదు. ఆమె తెలుగులో నటించకపోవడానికి గల కారణాలు మాత్రం ఆ పెద్దలే అని అంటున్నారు. దీంతో ఆమె బాలీవుడ్‌లో తన ప్రయత్నాలు మొదలుపెడుతుందని కొందరు చెబుతున్నారు.