Bahubali సీన్ రీక్రియేషన్.. కట్టప్పగా కాజల్ అగర్వాల్

లక్ష్మీ కళ్యాణం సినిమాతో తెలుగు తెరకు పరిచయమై.. చందమామ మూవీతో ఆడియన్స్‌ను మెప్పించి.. మగధీర చిత్రంతో టాలీవుడ్‌లో టాప్ హీరోయిన్‌గా మారిపోయింది కాజల్ అగర్వాల్ (Kajal Aggarwal). కెరీర్ టాప్ గేర్‌లో దూసుకుపోతున్న టైమ్‌లోనే ఈ పంజాబీ బ్యూటీ తన ఫ్రెండ్, వ్యాపార వేత్త గౌతమ్ కిచ్లూను వివాహం చేసుకున్నారు. పెళ్లి త‌ర్వాత సినిమాలకు దూరంగా ఉంటున్న కాజల్.. ఇటీవలె ఓ పండంటి బాబుకు జన్మనిచ్చిన సంగతి తెలిసిందే. తమ కుమారుడికి నీల్ కిచ్లూగా నామకరణం చేశారు ఈ బ్యూటీఫుల్ కపుల్.

తన కొడుకు ఫొటోలను కాజల్ ఇప్పటి వరకు ఎక్కడా కూడా బయట పెట్టలేదు. అయితే అప్పుడప్పుడు పూర్తిగా మొహం కనిపించకుండా ఉన్న ఫొటోలను అభిమానులతో షేర్ చేసుకుంటున్నారు. తాజాగా కాజల్ అగర్వాల్ షేర్ చేసిన ఓ పిక్ మాత్రం నెట్టింట తెగ వైరల్ అవుతోంది. రెబల్ స్టార్ ప్రభాస్ నటించిన బాహుబలి సినిమాలోని ఓ సీన్‌ను తన కొడుకుతో కలిసి రీక్రియేట్ చేశారు.

ఆ మూవీలో కటప్ప తలపై బాహుబలి కాలు పెట్టే సీన్‌ను ఇన్‌స్ప్రేషన్‌గా తీసుకున్న కాజల్ అగర్వాల్.. తన కొడుకుతో కలిసి అలా చేశారు. కాజల్ కట్టప్ప మాదిరి తన తల కిందకు వంచగా.. నీల్ కిచ్లూ ఆమె తలపై కాలు పెట్టిన పిక్‌ను ఇన్‌స్టాగ్రామ్ స్టోరీస్‌లో పోస్ట్ చేశారు. అంతేకాకుండా ఇది నీల్, తన డెడికేషన్ సార్ అంటూ దర్శకధీరుడు రాజమౌళికి చెప్పారు. అందరిలానే తాము కూడా ఎలా ఇన్‌స్పైర్ కాకుండా ఉంటామంటూ ఈ స్టార్ హీరోయిన్ రాసుకొచ్చింది.

ప్రస్తుతం కాజ‌ల్ అగ‌ర్వాల్ రీ ఎంట్రీ కోసం ఫ్యాన్స్ అందరూ ఆసక్తిగా ఎదురు చుస్తున్నారు. క‌మ‌ల్ హాస‌న్ (Kamal Haasan) హీరోగా.. శంక‌ర్ (Shankar) డైరెక్షన్‌లో తెరకెక్కనున్న ఇండియ‌న్ 2 (Indian 2) మూవీ ద్వారా అభిమాలను అలరించేందుకు రెడీ అవుతున్నారు. ఈ మూవీకి కాజల్ ఎప్పుడో ఒకే చెప్పినా.. కరోనా, ఇతర కారణాలతో ఈ ప్రాజెక్ట్ వాయిదా పడింది. సెప్టెంబర్ నుంచి మళ్లీ పట్టాలెక్కనున్నట్లు తెలుస్తోంది. ఈ షెడ్యూల్‌లో కాజల్‌కు సంబంధించిన షూటింగ్ పార్ట్ కంప్లీట్ చేసేందుకు మూవీ మేకర్స్ ప్లాన్ చేస్తున్నారు.