పోలీసులకు అందని దూరంలో ‘చందమామ’

కృష్ణవంశీ దర్శకత్వంలో రూపొందించిన ‘చందమామ’ సినిమాతో పాపులరైన హీరోయిన్ సింధు మీనన్‌పై పోలీసులు చీటింగ్ కేసు నమోదు చేశారు. సింధు మీనన్ సోదరుడు మనోజ్ కార్తికేయన్ బెంగళూరులోని బ్యాంక్ ఆఫ్ బరోడా నుంచి రూ.30 లక్షలు రుణం తీసుకున్నాడు. ఇందుకు సింధు మూడో గ్యారంటర్‌గా ఉంది. అయితే, చాలా రోజుల నుంచి రుణం చెల్లించకపోగా, నకిలీ డాక్యుమెంట్లు ఇచ్చి మోసం చేశారని బ్యాంకు అధికారులు ఆమెపైనా, ఆమె సోదరులపైనా బెంగళూరులోని ఆర్‌ఎంసీ పోలీస్ స్టేషన్‌లో ఫిర్యాదు చేశారు.

ఈ మేరకు పోలీసులు సింధు సోదరుడు కార్తికేయన్‌ను అరెస్టు చేశారు. ఈ కేసుపై సింధు మీనన్ కూడా అరెస్టు చేయడానికి ప్రయత్నించారు. ఆమె విదేశాల్లో ఉన్న నేపథ్యంలో సాధ్యం కాలేదు. చందమామ తర్వాత మరికొన్ని తెలుగు, తమిళ చిత్రాల్లో నటించిన సింధు.. ఓ ఐటీ ఉద్యోగిని వివాహం చేసుకుని లండన్‌లో స్థిరపడింది. ఈ నేపథ్యంలో ఆమెను ఇండియాకు తీసుకొచ్చేందుకు ప్రయత్నాలు చేస్తున్నారు.