మెగా ఫ్యామిలీలో నా మనసుకు దగ్గరైన వ్యక్తి.. శ్రీరెడ్డి క్రీమ్ బిస్కెట్!

వివాదాస్పద నటి శ్రీరెడ్డి మెగా ఫ్యామిలీని టార్గెట్ చేసిన సంగతి తెలిసిందే. మరీ ముఖ్యంగా జనసేన అధినేత, పవర్ స్టార్ పవన్ కళ్యాణ్‌ను లక్ష్యంగా చేసుకుని సోషల్ మీడియా ద్వారా శ్రీరెడ్డి ఎలాంటి వ్యాఖ్యలు చేసిందో అందరికీ తెలుసు. ఆయనతో పాటు నాగబాబును కూడా శ్రీరెడ్డి దుర్భాషలాడింది. మొత్తానికి మెగా అభిమానులకు శ్రీరెడ్డి బద్ధ శత్రువుగా మారిపోయింది. అయితే, తనకు చిరంజీవి కుటుంబంలో ఒక వ్యక్తి అంటే ఎంతో ఇష్టమని శ్రీరెడ్డి తాజాగా షాక్ ఇచ్చింది.

‘ఆశ్చర్యకరంగా చిరంజీవి కుటుంబంలో ఒక వ్యక్తిని నేను ఎంతగానో ఇష్టపడతాను. మచ్చలేని వ్యక్తి, స్ఫూర్తిప్రదాత. ఎవరో చెప్పగలరా’ అంటూ ఫేస్‌బుక్‌లో శ్రీరెడ్డి పోస్ట్ చేసింది. శ్రీరెడ్డి ప్రశ్న అడగటం తరువాయి కింద కామెంట్లను అందుకున్నారు. రామ్ చరణ్ అని ఒకరు, అల్లు అర్జున్ అని మరొకరు సమాధానాలు ఇచ్చారు. సాయిధరమ్ తేజ్, వరుణ్ తేజ్, అల్లు అరవింద్, శిరీష్ ఇలా అందరి పేర్లు కామెంట్లలో కనిపించాయి. ఆఖరికి కొంత మంది పవన్ కళ్యాణ్ అంటూ సరదాగా రిప్లై ఇచ్చారు. కానీ వాళ్లందరికీ షాక్ ఇస్తూ ఒకరి పేరును శ్రీరెడ్డి ప్రకటించింది. ఆ వ్యక్తి ఎవరో కాదు రామ్ చరణ్ భార్య ఉపాసన కొణిదెల.
‘అవును, ఆ వ్యక్తి ఈవిడే. నాకు ఎంతో దగ్గరైన వ్యక్తిగా భావిస్తాను. గొప్ప వ్యక్తి, స్వీట్, వినయ విధేయత కలిగిన వ్యక్తి, కష్టపడే తత్వం, ఎంతో సరదాగా ఉంటుంది, ఫ్యామిలీ లేడీ, సక్సెస్‌ఫుల్ లేడీ. ఆవిడ ఎవరో కాదు స్ఫూర్తినిచ్చే మహిళ ఉపాసన రెడ్డి కామినేని’ అంటూ మరో పోస్ట్ చేసింది శ్రీరెడ్డి. ఈ పోస్ట్‌లో ఉపాసన కొణిదెల అని రాయకుండా ఉపాసన రెడ్డి కామినేని అని రాసి మెగా ఫ్యామిలీపై తనకున్న అక్కసును మరోసారి వెల్లగక్కింది శ్రీరెడ్డి. కానీ, ఉపాసనకి మాత్రం క్రీమ్ బిస్కెట్ వేసేంది. అసలు ఉపాసన ప్రస్తావన ఇప్పుడెందుకు తీసుకు వచ్చిందో అర్థం కాని విషయం.