అసభ్యకరంగా నన్ను తాకాడు: నటి ఫేస్‌బుక్ పోస్ట్

హిందీ సినిమా, టీవీ నటి టినా దత్తా తనకు ఎదురైన చేదు అనుభవాన్ని వివరిస్తూ ఫేస్‌బుక్‌లో పోస్ట్ చేసింది. ప్రయాణంలో వెనక సీటులో కూర్చున్న వ్యక్తి తనను అసభ్యంగా తాకాడని , కంప్లైంట్ చేసినా ఎవరూ పట్టించుకోలేదని ఆమె తెలిపింది.

టినా దత్తా రెండు రోజుల కింద ముంబై నుంచి రాజ్‌కోట్‌ జెట్ ఎయిర్ వేస్ విమానంలో ప్రయాణం చేసింది. తనతో పాటు ఆమె మేనేజర్ కూడా పక్క సీటులో కూర్చున్నాడు. వారిద్దరూ తమ వర్క్ గురించి డిస్కస్ చేస్తూ ఉన్నారు. విమానం టేకాఫ్ తీసుకుంటుందన్న సమయంలో వెనక సీటులో కూర్చున్న ఓ వ్యక్తి టినాను అసభ్యకరంగా తాకడం మొదలు పెట్టాడు. మొదట ఎవరో చిన్న పిల్లాడు తాకుతున్నాడులే అనుకొని ఆమె మామూలుగా ఉండిపోయింది. అయితే అతి చేయడంతో వెనక్కి తిరిగి చూడగా అతను చిన్న పిల్లాడు కాదు, చాలా వయసున్న వ్యక్తే ఈ పని చేస్తున్నాడని తెలిసి షాక్ తింది.

వెంటనే టినా ఆ ప్రయాణికుడ్ని నిలదీసింది. దీంతో పరువు పోతుందని భావించిన రాజేశ్ అనే ఆ ప్రయాణికుడు తాను చేసిన పనికి సిగ్గుతో తలదించుకుని క్షమించమని కోరాడు. ఈ ఘటనతో విమానంలో సీన్ క్రియేట్ అయింది. ఎయిర్ హోస్టెసెస్ వచ్చి జరిగిన విషయాన్ని తెలుసుకున్నారు. అయితే ఇలాంటివి మామూలే, చిన్న విషయం వదిలేయండి కావాలంటే మీ సీట్ మారుస్తాం అని చెప్పారు. దీంతో ఆగ్రహించిన టినా, సీటు మార్చటం కాదు ఆ వ్యక్తిని విమానంలోంచి దించేయాల్సిందిగా డిమాండ్ చేసింది. అయితే జెట్ ఎయిర్ వేస్ సిబ్బంది పట్టించుకోలేదని వాపోయింది. మిగతా ప్రయాణికులందరూ ఏదో షో చూస్తున్నట్లుగా ఎంజాయ్ చేశారే తప్ప ఎవరు తనకు సపోర్ట్ చేయలేదని పేర్కొంది.



ఒంటరిగా ఆడ పిల్లలు ప్రయాణిస్తే వారికి రక్షణ లేదా? తమ ఇంట్లోని ఆడవారికి ఇది జరిగితే ఇలాగే స్పందిస్తారా? అంటూ ఈ విషయాన్ని అందరి దృష్టికి తేవాలని టినా దత్తా తన ఫేస్‌బుక్ పేజీలో పోస్ట్ చేసింది.