కూలబడి కుదేలైంది
దేశంపై ద్వేషం, హిందూ ధర్మం పట్ల వ్యతిరేకత, హిందువులంటే చులకన భావంతో వ్యాఖ్యలు చేస్తూ సినిమాలు తీసే ఆమిర్ ఖాన్ చిత్రం లాల్ సింగ్ చడ్డా ఇప్పుడు కూలబడి కుదేలైందని విజయశాంతి అన్నారు. దేశవ్యాప్తంగా ఉన్న బాలీవుడ్ సినిమా ప్రేక్షకులు ఆమిర్ నైజం తెలుసుకుని ఆయన సినిమాలంటే అసహ్యించుకుంటున్న నేపథ్యంలో ఏం జరగబోతోందో గ్రహించి.. కనీసం పెట్టుబడైనా తిరిగి తెచ్చుకోవడానికి దక్షిణాది రాష్ట్రాల మీద.. విదేశీ మార్కెట్ మీదే ఆధారపడ్డాడన్నారు. టాలీవుడ్ ప్రముఖ హీరోలు ఎంత ప్రమోట్ చేసినా లాల్ సింగ్ పప్పులు ఉడకలేదంటూ కౌంటర్ ఇచ్చారు.
పాకిస్తాన్‌కి వంత పాడుతూ..
''దీనంతటికీ కారణం ఒకటే.. మేకవన్నె పులిలా వ్యవహరించే ఆమిర్ అసలు తీరుపై హిందూ సంస్థలు, మాతృదేశ, బీజేపీ అభిమానులు పెద్ద ఎత్తున సోషల్ మీడియా ద్వారా ప్రజలకు తెలియజేస్తూ.. వాస్తవాలపై అవగాహన కల్పిస్తూ వచ్చారు. ఫలితంగా ప్రజలు సత్యాన్ని తెలుసుకున్నారు. పాకిస్తాన్‌కి వంత పాడుతూ.. ఉగ్రవాదానికి నిధులిచ్చే టర్కీ దేశానికి అభిమాని అయిన ఆమిర్ ఖాన్ సినిమా టికెట్ డబ్బులను.. పేదల కోసమో, మరో మంచి ప్రయోజనానికో ఉపయోగించాలన్న మాలాంటి అసంఖ్యాక జాతీయవాదుల పిలుపును అందిపుచ్చుకుని తగిన రీతిలో స్పందించారు..'' అంటూ రాములమ్మ రాసుకొచ్చారు.
కరీనా కపూర్‌పై కూడా..
ఈ సందర్భంగా కరీనా కపూర్‌పై కూడా విజయశాంతి ఫైర్ అయ్యారు. తన సినిమాలు చూస్తే చూడండి.. లేకుంటే లేదన్న లాల్ సింగ్ హీరోయిన్ కరీనా కపూర్ వ్యాఖ్యల్లోని అహంకారాన్ని కూడా అర్థం చేసుకున్నారని అన్నారు. ప్రజలను అమాయకులుగా భావించి ఇష్టమొచ్చిన వ్యాఖ్యలు చేస్తే.. ఫలితాలు ఇలాగే ఉంటాయని గ్రహించాలని హితవు పలికారు. లాల్ సింగ్ చడ్డా మూవీ డిజాస్టర్‌గా నిలిచిన నేపథ్యంలో రాములమ్మ పెట్టిన పోస్ట్ వైరల్ అవుతోంది. బాగా చెప్పారు మేడం అంటూ నెటిజన్లు కామెంట్స్ పెడుతున్నారు.
ఇటీవల కూడా రాములమ్మ పోస్ట్..
లాల్ సింగ్ చడ్డా రిలీజ్‌కు ముందు కూడా ఆమిర్ ఖాన్‌పై విజయశాంతి ఆగ్రహం వ్యక్తం చేస్తూ.. సోషల్ మీడియాలో పోస్ట్ పెట్టారు. ఆమిర్ ఖాన్ హిందూ వ్యతిరేకతను మూటగట్టుకున్నారని అన్నారు. 'లాల్ సింగ్ చడ్డా' అనే ఇన్స్‌పిరేషనల్ మూవీతో ముందుకొచ్చారని.. కానీ, ప్రజల్లో ఏమాత్రం స్ఫూర్తిని నింపే స్థితిలో లేరన్నారు. గతంలో ఆమిర్ నటించిన పీకే సినిమాలో సైతం హిందూ వ్యతిరేకతనే ప్రధానంగా చూపించడమే కాకుండా.. హిందూ దేవుళ్లని అవమానించారని అన్నారు విజయశాంతి. ప్రజలు ఇంత చైతన్యంతో వ్యవహరిస్తున్నా.. మన సౌత్ హీరోలు కొందరు ఆ ప్రజల మనోభావాలు తమకు తెలియదన్నట్లు ఆమిర్ చిత్రాన్ని ప్రమోట్ చేస్తూ టీవీ షోల్లో పాల్గొంటున్నారంటూ రాములమ్మ కౌంటర్ ఇచ్చిన సంగతి తెలిసిందే.