అఖిల్ పారితోషకం.. వామ్మో ఆ రేంజ్‌లోనా!

కెరీర్ ఆరంభంలోని తొలి రెండు సినిమాలూ కమర్షియల్ గా ఫెయిలే అయినా.. అఖిల్ అక్కినేని పారితోషకం మాత్రం దిమ్మతిరిగిపోయే రేంజ్ లో ఉందనే టాక్ వినిపిస్తోంది టాలీవుడ్ లో. హీరోగా ఎంట్రీ ఇచ్చిన తొలి సినిమా ‘అఖిల్’, రెండో సినిమా ‘హలో’లు అఖిల్ ను నిరాశ పరిచాయి. తొలి సినిమా పూర్తి డిజాస్టర్ గా నిలవగా.. రెండో సినిమా కొంత వరకూ ఓకే అనిపించుకున్నా, కమర్షియల్ గా మాత్రం లాభాలు సంపాదించలేకపోయింది. దాదాపు నలభై శాతం నష్టాలను చవి చూసింది అఖిల్ రెండో సినిమా. ఈ క్రమంలో మూడో సినిమా విషయంలో ఆచితూచి అడుగులు వేస్తున్నాడు ఈ హీరో.

అయితే తొలి రెండు సినిమాలూ పోయినా.. అఖిల్ కు డిమాండ్ అయితే తగ్గలేదు. కుర్రాడితో సినిమాలు చేయడానికి నిర్మాతలు రెడీగా ఉన్నారు. ఈ క్రమంలో అఖిల్ తో సినిమా తీయ సంకల్పించిన నిర్మాత ఒకరి కథనం.. అంటూ ఇండస్ట్రీలో ఒక ప్రచారం సాగుతోంది. కథ, దర్శకుడు సిద్ధంగా ఉన్న నేపథ్యంలో అఖిల్ తో సినిమా చేయడానికి సదరు నిర్మాత ముందుకు రాగా.. అఖిల్ ఏకంగా పది కోట్ల రూపాయల పారితోషకాన్ని అడిగాడట!

మూడో సినిమాలో నటిస్తున్న హీరోకి ఇది భారీ మొత్తమే అని వేరే చెప్పనక్కర్లేదు. అందులోనూ తొలి రెండు సినిమాలూ ఆడలేదు. అయినా అఖిల్ రెమ్యూనరేషన్ మాత్రం రికార్డు స్థాయిలోనే ఉందట. అక్కినేని ఫ్యామిలీకి ఫ్యాన్ ఫాలోయింగ్ ఉండటం, అఖిల్ కు కూడా యూత్ లో అభిమానగణం ఏర్పడటంతో.. ఈ హీరో ఆ మాత్రం రెమ్యూనరేషన్ సబబే అనే లెక్కలో ఉన్నట్టుగా తెలుస్తోంది.