అడవిలో ‘అఖిల్’ ప్రియురాలు రొమాన్స్..!

రెండేళ్ల క్రితం అక్కినేని అఖిల్ తొలి సినిమా ‘అఖిల్’తో వెండితెరపైకి వచ్చిన సయేషా సైగల్ ప్రస్తుతం అడవిలో తమిళ హీరో జయం రవితో రొమాన్స్ చేస్తోంది. అడవి నేపథ్యంతో సాగే ‘వనమాంగన్’ సినిమాలో జయం రవి టార్జాన్ తరహా పాత్రలో నటిస్తుండగా.. అతనితో పీకల్లోతు ప్రేమలో ముగినిపోయిన ప్రియురాలిగా సయేషా నటిస్తోంది. ఈ చిత్రానికి సంబంధించిన కొన్ని స్టిల్స్ ఆన్‌లైన్‌లో ఇప్పటికే చక్కర్లు కొడుతున్నాయి.

అడవి నేపథ్యంలో సాగే కథ కావడంతో నటీనటుల కాస్టూమ్స్ విషయంలో చిత్ర యూనిట్ ఎక్కువ జాగ్రత్తలు తీసుకున్నట్లు తెలుస్తోంది. శరీరానికి ఆకులు చుట్టుకున్న తరహాలో ఉండే డ్రెస్‌లను ప్రత్యేకంగా రూపొందించినట్లు సమాచారం. దీంతో ఈ చిత్రంపై అభిమానుల్లో ఇప్పటికే భారీగా అంచనాలు పెరిగిపోయాయి. త్వరలోనే ఈ చిత్రాన్ని ప్రేక్షకుల ముందుకు తీసుకొచ్చేందుకు చిత్ర యూనిట్ సిద్ధమవుతోంది.