ఆ రొమాంటిక్ సీన్లంటే ఇష్టం: కమల్ కూతురు

‘రాజ్‌ తిలక్‌’ సినిమాలో తన తల్లిదండ్రులు కమల్‌హాసన్‌, సారిక మధ్య వచ్చే రొమాంటిక్ సన్నివేశాలు ఇష్టమని నటి అక్షర హాసన్‌ తెలిపారు. ఆమె నటించిన రొమాంటిక్ కామెడీ మూవీ ‘లాలీ కీ షాదీ మే లడ్డూ దివానా’ విడుదలకు సిద్ధమైంది. ఈ సినిమా ప్రమోషన్ కోసం నిర్వహించిన ఓ ఇంటర్వ్యూలో అక్షర హాసన్‌ ఆసక్తికర విషయాలను వెల్లడించారు. ‘రాజ్‌ తిలక్‌ సినిమా చూసినప్పుడు చాలా సంతోషంగా ఫీలవుతా. నిజ జీవితంలోనూ ప్రేమించి ఒక్కటైన వారి ప్రేమను వెండితెరపై చూసినప్పుడల్లా నా మనసు సంతోషంతో నిండిపోతుంది.’ అని అక్షర చెప్పారు. సారికతో చాలా ఏళ్ల క్రితమే విడిపోయిన కమల్.. తర్వాత గౌతమీతోనూ చాలా కాలం సహజీవనం చేసిన సంగతి తెలిసిందే.

తల్లిదండ్రులే చక్కటి విమర్శకులని చెప్పిన అక్షర.. తాను సరైన మార్గంలోనే వెళ్తున్నానని, అమ్మానాన్న కూడా అలాగే భావిస్తున్నారని చెప్పుకొచ్చింది. ఏ విషయమైనా వారిద్దరూ దాపరికాలు లేకుండా చెబుతారని, తన పనితీరు మెరుగుపర్చుకోవడానికి ఇది ఉపకరిస్తుందని ఆమె తెలిపింది. సినీ ప్రముఖుల కుమార్తెను అయినప్పటికీ.. కష్టించే పైకి వస్తున్నట్లు చెప్పిన అక్షర.. అసిస్టెంట్ డైరెక్టర్‌గా సినీ జీవితం ప్రారంభించానని, ఇప్పుడు నటినయ్యానని తెలిపింది. ఎక్కడా తండ్రి పేరు వాడుకోలేదని స్పష్టం చేసింది.

అయితే ఈ ఇంటర్వ్యూ సమయంలో ప్రముఖ డిస్ట్రిబ్యూటర్ సన్నీ ఖన్నాపై, ఇంటర్వ్యూర్‌పై అక్షర పెద్దగా అరిచినట్లు గుసగుసలు వినిపిస్తున్నాయి. తాను కెమెరా ముందున్న విషయాన్ని గమనించిన అక్షర వెంటనే తేరుకొని ఇంటర్వ్యూ కొనసాగించారని, తన ప్రవర్తన పట్ల సదరు జర్నలిస్టుతోపాటు డిస్ట్రిబ్యూటర్ కూడా ఆశ్చర్యం వ్యక్తం చేసినట్లు సమాచారం.