కాస్టింగ్‌కౌచ్‌పై అలియా భట్ స్పందన!

ఈ మధ్యకాలంలో చిత్ర పరిశ్రమలో బాగా చర్చనీయాంశం అయిన కాస్టింగ్ కౌచ్ పై స్పందించింది అలియా భట్. అవకాశాలను ఆశించే హీరోయిన్లను లైంగికంగా వాడుకుంటున్నారని, ఈ విషయంలో ఒత్తిళ్లు చిత్రపరిశ్రమలో చాలా సహజమే అనే అభిప్రాయాలు గట్టిగా వినిపిస్తున్న నేపథ్యంలో అలియా స్పందించింది. కొంతమంది ప్రముఖ హీరోయిన్లు కూడా ఈ అంశంపై స్పందిస్తూ చిత్రపరిశ్రమలో ఆ కల్చర్ ఉందన్నట్టుగా మాట్లాడారు.

అయితే అందుకు భిన్నంగా స్పందించింది అలియా. అవకాశాల కోసం లైంగిక వేధింపులు అనే అనుభవం తనకు ఎదురుకాలేదని అలియా స్పష్టం చేసింది. మూవీ ఇండస్ట్రీలో తనకు అలాంటి అనుభవాలు ఏవీ ఎదురుకాలేదని అలియా వివరించింది. ఒకవేళ అలాంటి అనుభవం ఎదురయి ఉంటే తను కచ్చితంగా చెప్పేదాన్ని అని, ఇకపై ఎవరైనా తనతో అలా ప్రవర్తించినా ఆ విషయాన్ని చెప్పేస్తానని అలియా వ్యాఖ్యానించింది.

అలాగని ఇండస్ట్రీలో అలాంటి పరిస్థితే లేదు అని అలియా అనలేదు. వేరే వాళ్లకు అలాంటి ఇబ్బందికరమైన పరిస్థితి ఎదురయి ఉండవచ్చునేమో అని అలియా వ్యాఖ్యానించింది. అలాంటి పరిస్థితిని ఎదుర్కొనే వారికి అలియా ఒక సలహా కూడా ఇచ్చింది.

ఎవరూ అలాంటి వేధింపులకు తలొగ్గవద్దు అని, వాటిని ధైర్యంగా ఎదుర్కొనాలని.. సొంత టాలెంట్‌ను నమ్ముకోవాలని వేరే వారి చేతిలో కీలుబొమ్మలుగా మారిపోయే పరిస్థితుల్లోకి వెళ్లవద్దని అలియా సూచించింది. ఎదగాలంటే ఎవరైనా కష్టాలను ఎదుర్కొనక తప్పదని.. ఆ దిశగా కష్టపడాలని అలియా అంటోంది.