ఇక అందరి చూపూ మహానటి మీదే!

ఎలాగూ ‘నా పేరు సూర్య నా ఇల్లు ఇండియా’ రానే వచ్చేసింది. మిక్డ్స్ టాక్ పొందింది ఈ సినిమా. కొన్ని ప్రశంసలు, కొన్ని పెదవి విరుపులతో ఈ సినిమా రివ్యూలు, రేటింగులు వచ్చాయి. విడుదల ముందు భారీ అంచనాలను కలిగి ఉన్న ఈ సినిమా అందుకు తగ్గ ఓపెనింగ్స్‌ను పొందింది. ఇక ఈ సినిమా ఏ రేంజ్ వసూళ్లు సాధిస్తుంది? ఎంత పెద్ద హిట్ అవుతుంది? అనేది చూడాల్సి ఉంది.

ఇక ఆ సంగతలా ఉంటే, ఏ మాత్రం గ్యాప్ లేకుండా మరిన్ని ఆసక్తిదాయకమైన సినిమాలు రాబోతున్నాయి. వచ్చేవారంలో విడుదల కానున్న సినిమాలు అప్పుడే ప్రచార పర్వాన్ని మొదలుపెట్టేశాయి. ఈ జాబితాలో ఉంది ‘మహానటి’. మే తొమ్మిదో తేదీన ఈ సినిమా విడుదల కాబోతోంది. అంతకన్నా ముందు రోజునే..అంటే మే 8వ తేదీనే యూఎస్‌లో ప్రీమియర్స్ ప్రదర్శన ఉంటుంది.

అటు క్లాస్‌లో మాస్ లో అమితాసక్తిని రేపుతున్న మిడ్ రేంజ్ బడ్జెట్ మూవీ ఇది. మహానటి సావిత్రి జీవితం సినీ ప్రియులందరికీ ఆసక్తిదాయకమైనదే. 70 యేళ్ల వయసు వారి దగ్గర నుంచి టీనేజ్ పిల్లల వరకూ అందరూ ఈ సినిమాపై ఆసక్తితో ఉన్నారు. ఫ్యామిలీ ఆడియన్స్ ఈ సినిమాకు క్యూ కట్టే అవకాశం ఉంది. మల్టీప్లెక్స్ ఆడియన్స్‌కు ఇంతకు మించిన ఆసక్తిదాయకమైన సినిమా లేదు.

సావిత్రి జీవిత పరిణామాల గురించి రకరకాల ప్రచారాలున్న నేపథ్యంలో అసలేం జరిగింది? ఈ సినిమాలో ఏం చూపారు? అనే విషయాలను తెలుసుకోవడానికి అనేక మంది థియేటర్లకు క్యూ కట్టే అవకాశం ఉంది. అచ్చం సావిత్రిలా కనిపిస్తున్న కీర్తీ సురేష్ పోస్టర్లు సినిమాపై ఆసక్తిని రెట్టింపు చేశాయి. ఇలాంటి అంచనాల మధ్యన రాబోతున్న ఈ బయోపిక్ ప్రేక్షకులకు ఎలాంటి అనుభూతి మిగులుస్తుందో!