పవన్, ఆలీ మధ్య దూరం పెరిగిందా..?

పవర్ స్టార్ పవన్ కళ్యాణ్, సినీ నటుడు ఆలీ మధ్య అనుబంధం గురించి తెలిసిందే.. పవన్ ప్రతి సినిమాలోనూ ఆలీ తప్పకుండా కనిపించాల్సిందే. ఇటీవల జనసేన కార్యాలయం ప్రారంభోత్సవం సందర్భంగా ఆలీ ఖురాన్‌ ప్రతిని బహుమతిగా ఇచ్చి తమ స్నేహబంధం గొప్పదనాన్ని చాటుకున్నాడు. పవన్ కూడా తన పక్కన ఆలీ లేకుంటే ఏదో వెలితిగా ఉంటుందని చెబుతుంటాడు. కానీ ఇటీవల వీరిద్దరి మధ్య దూరం పెరిగినట్లు కొన్ని రూమర్లు వస్తున్నాయి.

పవన్ ప్రతి చిత్రంలోనూ కచ్చితంగా నటించే ఆలీ ఈసారి మాత్రం అజ్ఞాతవాసిలో నటించలేదు. త్రివిక్రమ్, పవన్ కాంబినేషన్లో గతంలో వచ్చిన అత్తారింటికి దారేది చిత్రంలోనూ ఆలీ నటించాడు. కానీ ఈ సినిమాలో నటించడం లేదని తెలియడంతో... వారిద్దరి మధ్య దూరం పెరిగిందనే గుసగుసలు వినిపించాయి.
​
అజ్ఞాతవాసిలోనూ ఆలీ కోసం త్రివిక్రమ్ ఓ పాత్రను రూపొందించాడట. కానీ ఆలీ మాత్రం నటించేందుకు విముఖత వ్యక్తం చేశాడట. ఇందుకు కారణం.. జనసేన తరఫున వచ్చే ఎన్నికల్లో ఆలీ సీటు ఆశించాడట. కానీ తమ మైత్రిని ఆలీ ఇలా ఉపయోగించుకోవాలని చూస్తున్నాడేంటని అని పవన్ బాధపడ్డాడట. దీంతో ఇద్దరి మధ్య కాస్త దూరం పెరిగిందని, పర్యావసానంగా త్రివిక్రమ్ సినిమాలో ఆలీ నటించలేదని రూమర్లు వెలువడ్డాయి.

కానీ అందులో ఏ మాత్రం నిజం లేదట. బిజీ షెడ్యూల్ కారణంగానే డేట్లు సర్దుబాటు చేయడం కుదర్లేదని, అందుకే పవన్ సినిమాలో ఆలీ నటించలేదని, ఆయన అమెరికా వెళ్లినట్లు తెలుస్తోంది. వీరిద్దరి మధ్య ఎలాంటి గొడవలు లేవని, ఆల్ ఈజ్ వెల్ అని సమాచారం.