మోదీపై బన్నీ కామెంట్స్: తిట్టిపోస్తున్న నెటిజన్స్

ఆంధ్రప్రదేశ్‌కు ప్రత్యేక హోదా డిమాండుపై రాష్ట్రమంతా అట్టుడుకుతుంటే.. స్టైలిష్ స్టార్ అల్లు అర్జున్ ప్రధాని నరేంద్ర మోదీ గురించి చేసిన తాజా వ్యాఖ్యలు తీవ్ర దుమారం రేపుతున్నాయి. ఇటీవల ఓ ప్రముఖ మ్యాగ్జైన్‌.. అల్లు అర్జున్ ఫోటోను కవర్ పేజీపై ప్రచురించడంతో పాటు ఆయన ఇంటర్వ్యూ తీసుకుంది. ఈ సందర్భంగా అర్జున్ ప్రధాని మోదీ గురించి మాట్లాడారు.

‘‘ప్రధాని నరేంద్ర మోదీ స్ఫూర్తితో నేను ముందుకు సాగుతా’’ అని ఇంటర్వ్యూలో ఓ ప్రశ్న సమాధానమిచ్చాడు. ప్రస్తుతం ఏపీ మొత్తం మోదీపై వ్యతిరేకత వ్యక్తమవుతున్న నేపథ్యంలో.. బన్నీ ఆయనకు సానుకూలంగా వ్యాఖ్యలు చేయడాన్ని నెటిజన్లు విమర్శిస్తున్నారు. ఏపీకి ఇచ్చిన హామీలు నెరవేర్చని వ్యక్తి తనకు ఆదర్శమని ఎలా చెబుతాడంటూ ప్రశ్నలు కురిపిస్తున్నారు.

అయితే, బన్నీ మోదీ అంటే ఇష్టమని చెప్పలేదు. టీ అమ్ముకునే ఓ సాధారణ వ్యక్తి.. ప్రధాని స్థాయికి ఎదగడాన్ని యువత ఆదర్శంగా తీసుకున్నారని తెలిపారు. తాను కూడా ఆయన జీవితం నుంచి స్ఫూర్తి పొందుతానని మాత్రమే తెలిపాడు. ఏది ఏమైనా బన్నీ ఈ సమయంలో మోదీ పేరు ఎత్తకపోయుంటేనే బాగుండేదని కొందరు వ్యాఖ్యానిస్తున్నారు. మరి దీనిపై బన్నీ ఏం వివరణ ఇస్తారో చూడాలి.