అల్లు శిరీష్ సినిమా... చిత్రమైన టైటిల్..!

గత ఏడాదిలో ‘శ్రీరస్తు శుభమస్తు’ సినిమాతో తొలి హిట్ ను అందుకున్న అల్లు శిరీష్ తన కెరీర్ ను ఉత్సాహవంతంగా కొనసాగిస్తున్నాడు. వైవిధ్యమైన సినిమాలతో ప్రేక్షకుల ముందుకు వచ్చే ప్రయత్నాలు చేస్తున్నాడు. ఈ క్రమంలో శిరీష్ చేస్తున్న సినిమా టైటిల్ ఆసక్తిని రేకెత్తిస్తోంది. ‘ఏ నిమిషానికి ఏమి జరుగునో..’ అనేది శిరీష్ సినిమా టైటిల్!

మరి ఇది వరకూ పాత సినిమాల పాటల పల్లవిలను టైటిల్స్ గా పెట్టుకున్న సినిమాలెన్నో వచ్చాయి కానీ, అల్లు శిరీష్ చేస్తున్న ఈ సినిమా టైటిల్ మరింత ఆసక్తికరంగా ఉందని వేరే చెప్పనక్కర్లేదు. అలనాటి ‘లవకుశ’ సినిమాలో బాగా హిట్టై, క్లాసిక్ గా నిలిచిన పాట పల్లవిని శిరీష్ సినిమాకు టైటిల్ గా ఉపయోగించుకుంటున్నారు. సినిమా థ్రిల్లర్ అనే విషయాన్ని చాటుతోంది ఈ టైటిల్.

‘ఎక్కడికి పోతావు చిన్నవాడా’ సినిమా దర్శకుడు వీఐ ఆనంద్ డైరెక్షన్లో రూపొందుతోంది ఈ సినిమా. టైటిల్ విషయంలో ఆనంద్ తన ఇది వరకటి సినిమా స్టైల్ నే ఫాలో అయినట్టున్నాడు.