Anasuya Bharadwaj: సీఎం కేసీఆర్ నిర్ణయంపై అనసూయ రియాక్షన్.. ఇది తప్ప మాకే పనీ రాదంటూ ట్వీట్

కరోనా విలయతాండవాన్ని నివారించడం కోసమై లాక్‌డౌన్ అమలు చేస్తూ పకడ్బందీగా అన్నిరంగాల కార్యకలాపాలు నిలిపివేశాయి కేంద్ర, రాష్ట్ర ప్రభుత్వాలు. ఈ నేపథ్యంలోనే గత రెండున్నర నెలలుగా సినిమా, టీవీ సీరియల్స్ షూటింగ్స్ ఎక్కడికక్కడ ఆగిపోయిన సంగతి తెలిసిందే. అయితే ఇప్పుడు లాక్‌డౌన్ పూర్తిగా ఎత్తేసే దిశగా అడుగులు వేస్తున్న ప్రభుత్వం పలు సడలింపులు ఇస్తోంది. ఈ క్రమంలోనే సినిమా షూటింగ్స్ రీ ఓపెన్ చేసుకునేందుకు పర్మిషన్ కావాలంటూ సినీ పెద్దలు చేసిన అభ్యర్థనపై కేసీఆర్ పాజిటివ్‌గా స్పందించారు.

షూటింగ్స్ రీ ఓపెన్, సాధ్యాసాధ్యాలపై పరిశీలన చేసిన సీఎం కేసీఆర్.. పలు నిబంధనలు జారీ చేస్తూ షూటింగ్స్ రీ ఓపెన్ పర్మిషన్ ఇచ్చేశారు. ఇకపై తెలంగాణలో సినిమా, టీవీ షూటింగ్స్ చేసుకోవచ్చని అనుమతి ఇస్తూ సంబంధిత ఫైల్‌పై సంతకం చేశారు. అయితే ముఖ్యమంత్రి తీసుకున్న ఈ నిర్ణయంపై యాంకర్‌ అనసూయ భరద్వాజ్ స్పందిస్తూ తన ట్విట్టర్ ఖాతా ద్వారా ఆయనకు ప్రత్యేక కృతజ్ఞతలు చెప్పింది.

Also Read: ఆ హక్కు మీకు లేదు.. బీరు తాగి గమ్మునుండండి.. బాబుకు రామ్‌గోపాల్ వర్మ కౌంటర్

''మా పనులు చేసుకోవడానికి అనుమతి ఇచ్చినందుకు సీఎం కేసీఆర్‌ సర్‌కి‌, మంత్రి తలసాని శ్రీనివాస్‌ యాదవ్‌ సర్‌కి థ్యాంక్స్. సినీ పరిశ్రమలో అన్ని స్థాయిల్లో ఉన్న వారికి ఇది శుభవార్త. షూటింగ్స్ సమయంలో కరోనా పట్ల అన్ని జాగ్రత్తలు తీసుకుంటూ పని చేస్తామని హామీ ఇస్తున్నాము. ఎంటర్‌టైన్‌మెంట్ తప్ప మాకు ఏ ఇతర పని రాదు'' అంటూ తన సందేశాన్ని షేర్ చేసింది అనసూయ.

జబర్దస్త్ బ్యూటీగా ప్రతివారం ప్రేక్షకులను గిలిగింతలు పెట్టే అనసూయ.. లాక్‌డౌన్ నేపథ్యంలో షూటింగ్స్ రద్దు కావడంతో ఇన్ని రోజులు ఇంటికే పరిమితమైంది. అయితే ఈ సమయంలో సోషల్ మీడియా చిట్ చాట్స్ చేస్తూ తన అభిమానులతో రెగ్యులర్‌గా టచ్‌లో ఉంది ఈ రంగమ్మత్త.