చిరంజీవి సినిమాలో అనసూయ.. షాకింగ్ రెమ్యునరేషన్!

‘జబర్దస్త్’ షోతో యాంకర్‌గా మంచి గుర్తింపు తెచ్చుకున్న అనసూయ బుల్లితెరపై ఓ వెలుగు వెలుగుతున్నారు. మరోవైపు వెండితెరపై కూడా రాణిస్తున్నారు. ‘క్షణం’ సినిమాతో నటిగా మంచి గుర్తింపు తెచ్చుకున్న అనసూయ.. ‘రంగస్థలం’ సినిమాతో రంగమ్మత్తగా తెలుగు ప్రేక్షకుల గుండెల్లో నిలిచిపోయారు. ఇటీవల ‘F2’లో ఓ పాటలో నర్తించారు. ‘యాత్ర’ చిత్రంలో చిన్న పాత్ర చేశారు. ప్రస్తుతం అనసూయ ప్రధాన పాత్ర పోషించిన ‘కథనం’ సినిమా విడుదలకు సిద్ధంగా ఉంది. పాత్రల ఎంపికలో జాగ్రత్తలు తీసుకుంటూ ముందుకు వెళ్తోన్న అనసూయకు తాజాగా మెగాస్టార్ సినిమాలో అవకాశం దక్కిందని అంటున్నారు. దాదాపు ఖరారైపోయినట్లే అని సమాచారం.

సక్సెస్‌ఫుల్ డైరెక్టర్ కొరటాల శివ దర్శకత్వంలో చిరంజీవి ఒక సినిమా చేస్తోన్న సంగతి తెలిసిందే. ఈ సినిమాలో అనసూయకు మంచి ప్రాధాన్యత ఉన్న పాత్రను కొరటాల ఆఫర్ చేశారట. ఇంత పెద్ద ప్రాజెక్టులో మంచి రోల్ దక్కడంతో అనసూయ కూడా ఓకే చెప్పేశారని అంటున్నారు. అయితే, అనసూయకు పారితోషికం కూడా గట్టిగానే ఇస్తున్నారని సమాచారం. రూ.25 లక్షల నుంచి రూ. 30 లక్షలు రెమ్యునరేషన్‌గా అనసూయ తీసుకోబుతున్నారని ఫిల్మ్ వర్గాల టాక్. అంటే, ఓ చిన్న హీరోయిన్‌ తీసుకునేంత పారితోషికం అనసూయకు ఇస్తున్నారు. దీన్ని బట్టి అనసూయ పాత్ర ఎలా ఉండబోతోందో అర్థమవుతోంది.

ఇదిలా ఉంటే, మెగాస్టార్ చిరంజీవి ప్రస్తుతం ‘సైరా’ ప్రాజెక్టుతో బిజీగా ఉన్నారు. బ్రిటిష్‌ ప్రభుత్వంపై తిరగబడిన రాయలసీమకు చెందిన తొలి తరం పోరాట యోధుడు ఉయ్యాలవాడ నరసింహారెడ్డి జీవితం ఆధారంగా రూపొందుతున్న ఈ చిత్రానికి సురేందర్‌ రెడ్డి దర్శకత్వం వహిస్తున్నారు. రామ్‌ చరణ్‌ నిర్మాత. ఇటీవలే కేరళ అడవుల్లో కీలకమైన యాక్షన్ సన్నివేశాల్ని చిత్రీకరించారు. ప్రస్తుతం షూటింగ్ తుది దశకు చేరుకున్నట్టు సమాచారం. ఈ చిత్రంలో నయనతార, తమన్నా, అమితాబ్‌ బచ్చన్‌, జగపతిబాబు, సుదీప్‌, విజయ్‌ సేతుపతి కీలక పాత్రలు పోషిస్తున్నారు. రత్నవేలు సినిమాటోగ్రఫీ అందిస్తోన్న ఈ చిత్రానికి బాలీవుడ్ సంగీత దర్శకుడు అమిత్ త్రివేది సంగీతం సమకూరుస్తున్నారు.