మళ్లీ ఆ తప్పు చేయను: యాంకర్ ప్రదీప్

డ్రంక్‌ అండ్‌ డ్రైవ్‌లో పట్టుబడిన యాంకర్‌ ప్రదీప్‌ ఎట్టకేలకు పోలీసుల కౌన్సెలింగ్‌కు హాజరయ్యాడు. సోమవారం (జనవరి 8) అతడు తన తండ్రితో కలిసి గోషామహల్‌ ట్రాఫిక్‌ పోలీస్‌ స్టేషన్‌కు వచ్చాడు. అనంతరం గంటపాటు పోలీసులు ఇచ్చిన కౌన్సెలింగ్ క్లాసును శ్రద్ధగా విన్నాడు. కౌన్సెలింగ్ కార్యక్రమం కొనసాగుతోంది. డిసెంబర్ 31న అర్ధరాత్రి డ్రంకెన్ డ్రైవ్‌లో పట్టుబడ్డ ప్రదీప్‌‌పై జూబ్లీ హిల్స్ పోలీసులు కేసు నమోదు చేసిన విషయం తెలిసిందే. గతకొన్ని రోజులుగా పోలీసుల కౌన్సెలింగ్‌కు డుమ్మా కొడుతున్నాడనే వార్తల నేపథ్యంలో.. ప్రదీప్‌.. గోషా మహల్ పోలీస్ స్టేషన్‌లో ప్రత్యక్షమవడం ఆసక్తిగా మారింది.

పారిపోయాడు, భయపడ్డాడు అనే వార్తల్లో నిజం లేదని యాంకర్ ప్రదీప్ స్పష్టం చేశాడు. బిజీ షెడ్యూల్ ఉన్నందువల్లే కౌన్సెలింగ్‌కు హాజరు కాలేకపోయానని తెలిపాడు. మళ్లీ అలాంటి తప్పు చేయనని, కౌన్సెలింగ్‌లో తెలుసుకున్న విషయాలు మిగతా వారికి చెబుతానని ప్రదీప్ తెలిపాడు.

‘చట్టాలను కచ్చితంగా అనుసరిస్తా.. జరిగిన తప్పేదో జరిగిపోయింది. దాని నుంచి గుణపాఠం నేర్చుకున్నా. నన్ను నేను సరిదిద్దుకుంటున్నా. మా లాంటి వాళ్లను చూసి చాలా మంది ఫాలో అవుతారు. జరిగిన చేదు అనుభవాన్ని దాటుకొని ముందుకొచ్చి.. నేనూ నేర్చుకోవాలి’ అని ప్రదీప్ అన్నాడు.

కౌన్సెలింగ్ చాలా బాగుందని, అందరికీ అవగాహన కలిగించేలా ఉందని ప్రదీప్ తెలిపాడు. మద్యం ఆరోగ్యానికి హానికరమని, తాను చేసిన తప్పు ఎవరూ చేయొద్దని అతడు సూచించాడు. సోమవారం కౌన్సెలింగ్‌కు రావాలని మేసేజ్ వచ్చిందని, అందుకనుగుణంగానే వచ్చానని, భయపడి పారిపోయానన్న వార్తల్లో ఎలాంటి నిజం లేదని అతడు చెప్పుకొచ్చాడు.

నిబంధనల ప్రకారం.. తల్లి లేదా భార్యను తీసుకొని కౌన్సెలింగ్‌కు రావాల్సి ఉంది. అయితే.. ప్రదీప్ అవివాహితుడు కాబట్టి తల్లిని తీసుకురావాలి. ఈ విషయాన్ని పోలీసులు ముందుగానే అతడి దృష్టికి తీసుకొచ్చారు. నిబంధనలకు విరుద్ధంగా కారు అద్దాలకు బ్లాక్‌ఫిలిం ఏర్పాటు చేసిన అంశంలో ప్రదీప్‌పై మరో కేసు కూడా నమోదైంది.