హ్యాట్రిక్ హిట్ దర్శకుడితో బాలయ్య!

నందమూరి బాలకృష్ణ వరుస చిత్రాలతో బాక్సాఫీస్‌ వద్ద జోరు చూపిస్తున్నారు. యంగ్ హీరోలతో పోటీగా పడుతూ.. ఇటీవల 'పైసా వసూల్' చిత్రంతో ప్రేక్షకుల ముందుకు వచ్చిన బాలయ్య ప్రస్తుతం కె.ఎస్.రవికుమార్ దర్శకత్వంలో 'జై సింహా' సినిమాలో నటిస్తున్నాడు. ప్రస్తుతం ఈ సినిమా షూటింగ్ దశలో ఉండగా.. సంక్రాంతి కానుకగా ప్రేక్షకుల ముందుకు రానుంది.

అయితే ఈ సినిమా తరువాత బాలయ్య.. బోయపాటి శ్రీను, కృష్ణారెడ్డి వంటి దర్శకులతో పని చేసే అవకాశముందనే మాటలు వినిపించాయి. అయితే తాజా సమాచారం ప్రకారం లైన్‌లోకి దర్శకుడు అనీల్ రావిపూడి వచ్చి చేరాడు. బాలయ్య వందవ సినిమా సమయంలోనే అనీల్ రావిపూడి ఆయనకు కథ వినిపించాడు. కానీ అప్పుడు బాలయ్య 'శాతకర్ణి' సినిమా చేయాలని నిర్ణయించుకోవడంతో అనీల్ రావిపూడిని పక్కన పెట్టేశాడు. కానీ ఇప్పుడు అనీల్.. పటాస్, సుప్రీమ్, రాజా ది గ్రేట్ వరుస సక్సెస్‌ల కారణంగా బాలయ్య కూడా ఆయనతో కలిసి పని చేయడానికి ఆసక్తి చూపుతున్నాడట. నిజానికి అనీల్ రావిపూడి తన తదుపరి చిత్రంగా మల్టీస్టారర్ సినిమా ప్లాన్ చేశారు. ఒక హీరోగా వెంకీను కూడా ఫైనల్ చేసుకున్నాడు. కానీ ఇప్పుడు సడెన్‌గా బాలయ్యతో సినిమా చేస్తాడంటూ వార్తలు వినిపిస్తున్నాయి. మరి ఈ విషయంపై అధికార ప్రకటన వస్తుందేమో చూడాలి.