అనుష్క పెళ్లికూతురు కాబోతుందట!

తెలుగు, తమిళ బాషల్లో అనుష్కకు ఉన్న క్రేజ్ గురించి ప్రత్యేకంగా చెప్పనక్కర్లేదు. తన తోటి హీరోయిన్స్ పెళ్లి చేసుకొని లైఫ్‌లో సెటిల్ అవ్వడమో.. లేక ఫేడౌట్ అవ్వడమో జరుగుతోంటే అనుష్క మాత్రం ఇప్పటికీ వరుస చిత్రాలతో బిజీగానే గడుపుతోంది. ప్రస్తుతం బాహుబలి2, ఓం నమో వెంకటేశాయా, భాగమతి చిత్రాల్లో నటిస్తున్న స్వీటీ.. ఈ సినిమాల తర్వాత మరే ఇతర కొత్త సినిమాలు అంగీకరించడం లేదని తెలుస్తోంది. దానికి కారణం ఆమె పెళ్లి చేసుకోవడమే అని చెప్పుకుంటున్నాయి కోలీవుడ్ వర్గాలు.
అవును.. నిజమే మరికొద్ది రోజుల్లో అనుష్క ఇల్లాలు కాబోతుంది. ఆమెకు టాలీవుడ్‌కు చెందిన ప్రముఖ నిర్మాతతో పెళ్లి జరగబోతుందని రీసెంట్‌గా ఓ టాక్ వచ్చింది. కానీ అందులో నిజం లేదనే టాక్ కూడా వినిపిస్తోంది. ఎందుకంటే అనుష్క తల్లితండ్రులు ఆమెను హైదరాబాద్‌కు చెందిన ఓ వ్యాపారవేత్తకు ఇచ్చి పెళ్లి చేయాలనే నిర్ణయం తీసుకున్నారట. అనుష్క పెళ్లిపై రోజుకో విధమైన పుకార్లు పుట్టుకొస్తుండడంతో వచ్చే ఏడాది ఎట్టి పరిస్థితుల్లో ఆమెకు వివాహం చేయాలని బలంగా ఆమె ఇంట్లో వాళ్ళు నిర్ణయించుకున్నట్లు తెలుస్తోంది.