రోమాలు నిక్కబొడిచేలా ‘భాగమతి’ ఇంటర్వెల్ సీన్: హీరో నాని

ఫ్యామిలీలో ఎవరైనా సూపర్ స్టార్ ఉంటే ఎలాంటి ఫీలింగ్ ఉంటుందో.. ఇప్పుడు తనకు అనుష్క విషయంలో అలాంటి అనుభూతే ఉందని న్యాచురల్ స్టార్ నానీ అన్నాడు. కొద్ది కాలం పరిచయంతోనే తనకు స్వీటీ ఓ ఫ్యామిలీ మెంబర్‌ అయిపోయిందని చెప్పాడు. అనుష్క ప్రధాన పాత్రలో రూపొందిన థ్రిల్లర్ మూవీ ‘భాగ‌మ‌తి’ ఫ్రీ రిలీజ్ ఫంక్షన్ ఆదివారం (జనవరి 21) హైదరాబాద్‌లో నిర్వహించారు. ఈ వేడుకకు అతిథిగా హాజరైన నానీ మాట్లాడుతూ.. ఈ ఏడాది తెలుగు ఇండస్ట్రీకి సాలీడ్ బ్లాక్ బస్టర్ ఇంకా పడలేదని.. ‘భాగమతి’ ఆ లోటు తీరుస్తుందని చెప్పాడు.

భాగమతి ఇంటర్వెల్ సీన్ రోమాలు నిక్కబొడిచేలా ఉందని నానీ అన్నాడు. తనకు బాగా తెలిసిన వ్యక్తి భాగమతి రీ-రికార్డింగ్ సందర్భంగా అక్కడే ఉన్నాడని, ఆ సీన్ చూడగానే తనకు ఫోన్ చేసి విషయం చెప్పాడని నానీ తెలిపాడు. ఈ విషయం ఇప్పటిదాకా స్వీటీకి కూడా చెప్పలేదని నానీ తెలిపాడు.

సినిమాలో అనుష్క పర్‌ఫార్మెన్స్ చూస్తుంటే.. ఈ ఏడాది అవార్డులన్నీ ఆమెనే వరించేలా ఉన్నాయని నానీ కొనియాడాడు. అశోక్‌‌ను ఇప్పటిదాకా ‘పిల్ల జమీందార్’ డైరెక్టర్‌గా గుర్తు పెట్టుకున్నారని, జనవరి 26 తర్వాత అశోక్ అనగానే.. ‘భాగమతి’ దర్శకుడు అంటారని నానీ అన్నాడు.

అనుష్క మాట్లాడుతూ.. యూవీ క్రియేషన్స్ నిర్మాతలకు ప్రత్యేకంగా థాంక్స్ చెప్పింది. తనకు భాగమతి కథను 2012లో వినిపించారని.. కానీ, కాల్షీట్లు కుదరకపోవడంతో సినిమా ఆలస్యమైందని ఆమె తెలిపింది. ‘ఇంతకాలం నిర్మాతలు నా కోసం వేచి చూశారు. నన్ను కాదని మరో హీరోయిన్‌తో సినిమా పూర్తి చేస్తే చాలా బాధ పడేదాన్ని’ అని స్వీటీ చెప్పుకొచ్చింది.

స్టేజీపై ఉన్న ప్రతి ఒక్కరికీ పేరుపేరునా థాంక్స్ చెప్పిన అనుష్క.. తనను అందరూ స్వీటీ అని ఎందుకు పిలుస్తారో మరోసారి గుర్తు చేసింది. యాంకర్ ప్రశాంతికి కూడా ప్రత్యేకంగా ధన్యవాదాలు చెప్పింది. డైరెక్టర్ అశోక్‌కు త్రిప్లెట్స్ (ముగ్గురు కవలలు) పిల్లలు అని తెలిపిన స్వీటీ, వారు ఓ సినిమా ఫంక్షన్‌కు రావడం ఇదే తొలిసారని చెబుతూ హర్షం ప్రకటించింది.

అనుష్కకు ‘అరుంధతి’ ఎలాంటి పేరు తీసుకొచ్చిందో.. ‘భాగమతి’ కూడా అలాంటి పేరునే తీసుకురావాలని ఆశిస్తున్నట్లు ప్రముఖ నిర్మాత అల్లు అరవింద్ అన్నారు. ఈ కార్యక్రమానికి మారుతి, గాంధీ, వంశీ, ప్రమోద్ తదితరులు హాజరయ్యారు.

తమన్ సంగీతం సమకూరుస్తున్న ‘భాగమతి’ చిత్రం జనవరి 26న ప్రేక్షకుల ముందుకు రానుంది. తెలుగుతో పాటు తమిళం, మలయాళ భాషల్లోనూ ఈ సినిమాను విడుదల చేస్తున్నారు. ఈ చిత్రంలో ఆది పినిశెట్టి మరోసారి ప్రతినాయక పాత్రలో అలరించనున్నాడు. జ‌య‌రామ్‌, ఉన్ని ముకుంద‌న్‌, ఆశా శ‌ర‌త్ కీల‌క పాత్రలు పోషించారు.

భాగమతి థీమ్ సాంగ్..