‘జైసింహా’ను వెనక్కి నెట్టిన ‘భాగమతి’!

నటసింహం నందమూరి బాలకృష్ణకు అనుష్క షాక్ ఇచ్చింది. వసూళ్ల విషయంలో బాలయ్య ‘జైసింహా’ సినిమాను ‘భాగమతి’ బీట్ చేసింది. ప్రపంచ వ్యాప్తంగా బాక్సాఫీసు కలెక్షన్లలో ‘భాగమతి’ దూసుకుపోతోంది. టీజర్, ట్రైలర్‌లతో పాటు చిత్రానికి ప్రచారం కూడా బాగా జరపడంతో ఈ సినిమాపై భారీ అంచనాలు ఏర్పడ్డాయి. సినిమా కూడా ప్రేక్షకుల అంచనాలను అందుకోవడంతో వసూళ్లు అదిరిపోతున్నాయి. దేశ వ్యాప్తంగా మొత్తం 1200 థియేటర్లలో ‘భాగమతి’ విడుదలైంది. దక్షిణాదిలో ఓ నటీమణి ప్రధాన పాత్ర పోషించిన సినిమా ఈ స్థాయిలో విడుదలవడం ఇదే తొలిసారి.

ఆంధ్రప్రదేశ్, తెలంగాణ రాష్ట్రాల్లో అయితే జనవరి 26వ తేదీ ఉదయం ఆట నుంచే అద్భుతమైన స్పందన వచ్చింది. అన్ని షోలు హౌస్‌ఫుల్ అయ్యాయి. దీంతో తొలి రోజులు రెండు రాష్ట్రాల్లో కలుపుకుని రూ.7.70 కోట్ల గ్రాస్ వసూలు చేసింది. దీనిలో డిస్ట్రిబ్యూటర్ల షేర్ రూ.5.20 కోట్లు. ఇక ఈ సినిమాను డబ్బింగ్ చేసి తమిళం, మలయాళంలో కూడా విడుదల చేసిన విషయం తెలిసిందే. అక్కడ కూడా మంచి ఓపెనింగ్సే వచ్చాయి. తమిళనాడులో తొలిరోజు రూ. 2.24 కోట్ల గ్రాస్ వసూలు చేసింది. ఒక్క చెన్నైలోనే రూ.37 లక్షల గ్రాస్ వసూలు కావడం విశేషం. ఇక కేరళ బాక్సాఫీసు వద్ద తొలిరోజు రూ.56 లక్షల గ్రాస్‌ను ‘భాగమతి’ వసూలు చేసింది.

మరోవైపు కర్ణాటకలో కూడా విడుదలైన ‘భాగమతి’.. తొలిరోజు రూ.1.35 కోట్ల గ్రాస్ వసూలు చేసింది. ఇక ముంబైతో దేశంలోని ఇతర ప్రాంతాల్లో రూ.80 లక్షలు వసూలు చేసిన ‘భాగమతి’.. అమెరికా బాక్సాఫీసు వద్ద రూ.1.75 కోట్లు రాబట్టింది. మొత్తంగా చూస్తే తొలిరోజు ‘భాగమతి’ రూ.14.40 కోట్ల గ్రాస్ వసూలు చేసింది. దీనిలో డిస్ట్రిబ్యూటర్ల వాటా రూ.7.21 కోట్లుగా ఉంది. దీంతో బాలయ్య ‘జైసింహా’ తొలిరోజు కలెక్షన్స్‌ను అనుష్క సినిమా దాటేసింది. సంక్రాంతి కానుకగా వచ్చిన ‘జైసింహా’ తొలిరోజు రూ.12.20 కోట్ల గ్రాస్‌ను వసూలు చేసింది. దీంతో 2018లో ఇప్పటివరకు అత్యధిక వసూళ్లు రాబట్టిన సినిమాల్లో ‘భాగమతి’ రెండో స్థానంలో నిలిచింది. ‘అజ్ఞాతవాసి’ మొదటి స్థానంలో ఉంది.