Mohan Babu: ఖబడ్దార్.. వైసీపీ సినీస్టార్స్ మీ ఆటలు సాగవ్: చంద్రబాబు హెచ్చరిక

జగన్ పార్టీలో చేరి తనను విమర్శిస్తున్న సినీ తారలపై ఘాటైన వాఖ్యలు చేశారు ఏపీ సీఎం చంద్రబాబు నాయుడు. కేసీఆర్‌కి భయపడి తనపై ఆరోపణలు చేస్తున్నారని.. ఆయనకు ఊడిగం చేస్తే చేసుకోండి కాని ఏపీ ప్రజల్ని రెచ్చగొడితే ఖబద్దార్ అంటూ హెచ్చరించారు చంద్రబాబు.

ఈ సందర్భంగా ఆయన మాట్లాడుతూ.. ‘ఎన్నికలు వచ్చే సరికి ఏపీకి చాలా వలస పక్షులు వచ్చాయి హైదరాబాద్ నుంచి. వైసీపీ తరుపున ఇక్కడ ప్రచారం చేస్తున్న వాళ్లు ఇక్కడ వాళ్లు కాదు. హైదరాబాద్ నుండి కేసీఆర్ బెదిరించి పంపంచాడు. ఫోన్ చేసి నువ్ హైదరాబాద్‌లో ఉండాలంటే నువ్ వైసీపీకి పనిచేయి అని బెదిరిస్తున్నాడు. అక్కడ నుంచి వస్తున్నారు. ఆయన ప్రలోభాలకు లోనై ఇక్కడకు వచ్చి నన్ను తిడుతున్నారు.

ఎవరీ మోహన్ బాబు.. ఎవరీ జయసుధ.. ఎవరీ అలీ.. ఈ మనుషులంతా ఎవరు? హైదరాబాద్‌లో ఉన్నారు మీరు అక్కడ ఉండండి. కేసీఆర్‌కి ఊడిగం చేస్తున్నారు చేసుకోండి. ఇక్కడకు వచ్చి మీ పెత్తనం ఏంటి? మేం కష్టకాలంలో ఉంటే స్పందించారా మీరు. తిత్లీ, హుద్‌హుద్ తుఫాన్లకు వచ్చారా మీరు. కరువు ఉంటే ఏనాడైనా వచ్చారా? జనం నీరు లేక అల్లాడిపోతుంటే నేను నీళ్లు తీసుకువచ్చా. ఈరోజు మేం కష్టపడి నిలదొక్కుకోవడానికి ప్రయత్నిస్తుంటే మీరొచ్చి పెత్తనం చేస్తారా? ఖబడ్దార్ జాగ్రత్తగా ఉండండి. మీవల్ల అయితే పనిచేయండి. కావాలంటే కేసీఆర్‌కి ఊడిగం చేసుకోండి. బాంచన్.. నీ కాళ్లు మొక్కుతా అని ఆ నీళ్లు నెత్తిపై జల్లుకోండి. మీ ఆటలు నా దగ్గర మీ ఆటలు సాగవు అని హెచ్చరిస్తున్నా’ అంటూ వైసీపీలో చేరిన సినీతారలకు హెచ్చరికలు జారీ చేశారు ముఖ్యమంత్రి చంద్రబాబు.