ఒకప్పుడు శ్రీదేవి నాన్నకు భార్య మాత్రమే.. కానీ నేడు?

శ్రీదేవికి బోనీ కపూర్‌తో పెళ్లి కాకముందు మోనా శౌరేతో పెళ్లయిన సంగతి తెలిసిందే. వారి కుమారుడు అర్జున్ కపూర్‌కు శ్రీదేవితో అంతగా సంబంధాలు లేవు. తను హీరోగా ఎదిగినప్పటికీ.. ఎప్పుడూ తన సవతి తల్లితో ఎదురుగా కూర్చోని మాట్లాడలేదని మూడేళ్ల క్రితం అర్జున్ చెప్పాడు. శ్రీదేవితో సహృద్భావ సంబంధాలు ఉన్నాయని చెప్పినప్పటికీ.. ఆమెతో ఎప్పుడూ పెద్దగా మాట్లాడలేదని చెప్పాడు. శ్రీదేవిని తన తండ్రి భార్యగా మాత్రమే చెప్పిన ఆయన.. తండ్రి జీవిత భాగస్వామిగా తనను గౌరవిస్తానని చెప్పాడు.


కానీ శ్రీదేవి మరణం వార్త తెలుసుకున్న అర్జున్ కపూర్ తన చిత్రం ‘నమస్తే ఇంగ్లాండ్’ షూటింగ్‌ను క్యాన్సిల్ చేసుకుని వెంటనే ముంబై చేరుకున్నాడు. శుక్రవారం అమృత్‌సర్‌లోని స్వర్ణదేవాలయాన్ని దర్శించుకున్న అనంతరం పంజాబ్‌లో అర్జున్ కపూర్ షూటింగ్ ప్రారంభించాడు. శ్రీదేవి మరణం వార్త తెలియగానే విషణ్ణ వదనంతో ముంబైలోని అనిల్ కపూర్ నివాసానికి చేరుకున్నాడు. కానీ శ్రీదేవి మరణించారు కదా.. మీ రియాక్షన్ ఏంటని కొందరు మీడియా ప్రతినిధులు ప్రశ్నించగా.. స్పందించడానికి ఆయన నిరాకరించాడు.

శ్రీదేవి భౌతిక కాయాన్ని దుబాయ్ నుంచి తీసుకురావడం ఆలస్యం కావడంతో.. తండ్రికి తోడుగా నిలవడం కోసం అర్జున్ కపూర్ మంగళవారం ఉదయం దుబాయ్ వెళ్లాడు. అక్కడ ఫార్మాలిటీస్ పూర్తి చేసుకొని శ్రీదేవి పార్థీవ దేహాన్ని ఇండియా తీసుకు రావడంలో అర్జున్ కీలకంగా వ్యవహరించనున్నాడు.