పొట్ట చెక్కలయ్యేలా నవ్విస్తున్న 'ముబారకన్ ట్రైలర్'

అర్జున్ కపూర్, అనిల్ కపూర్, ఇలియానా, అతియా శెట్టి ప్రధాన పాత్రల్లో తెరకెక్కిన ముబారకన్ మూవీ ట్రైలర్ రిలీజైంది. అచ్చం ఒకేలాగా కనిపించే కవల సోదరులుగా అర్జున్ కపూర్ ద్విపాత్రాభినయం చేసిన ఈ సినిమా ద్వారా చాలా గ్యాప్ తర్వాత ఇలియానా మళ్లీ బాలీవుడ్‌లో తన అదృష్టాన్ని పరీక్షించుకుంటోంది. అనీస్ బజ్మీ డైరెక్ట్ చేసిన ముబారకన్ ఓ పంజాబీ ఫ్యామిలీ నేపథ్యంతో తెరకెక్కింది.

ఈ సినిమాలో అర్జున్ కపూర్ కరణ్, చరణ్ అనే రెండు విభిన్నమైన పాత్రల్లో నటించాడు. ఇందులో కరణ్ ఓ హార్ట్ బ్రేకర్‌గా కనిపించనుండగా చరణ్‌ది ఓ సింపుల్ బాయ్ పాత్ర. ఇక బింకిల్ పాత్ర పోషించిన అతియా శెట్టి సంస్కృతి, సంప్రదాయాలు పాటించే యువతి కాగా స్వీటీ పాత్ర పోషించిన ఇలియానా మాత్రం ఓ అల్లరి పిల్ల.

లాస్ట్ బట్ నాట్ లీస్ట్.. కర్తార్ సింగ్‌గా ఎంట్రీ ఇచ్చే అనిల్ కపూర్‌ది మరో సరదా సర్ధార్ పాత్ర. ఈ పాత్రలన్నింటి మధ్య జరిగే కథనమే 'ముబారకన్' అని ట్రైలర్ ద్వారా చెప్పకనే చెప్పాడు అనీస్ బజ్మీ. ఇవాళ విడుదలైన ఈ సినిమా ట్రైలర్ ఆద్యంతం నవ్వుల పూలు పూయిస్తోంది. కానీ కథనం ఏమాత్రం అటు ఇటైనా ఆడియెన్స్‌కి కన్‌ఫ్యూజన్ మాత్రం తప్పదని అనిపిస్తోంది.