అల్లు అర్జున్‌కి తండ్రిగా యాక్షన్ కింగ్!

టాలీవుడ్, కోలీవుడ్‌కి చెందిన ఇద్దరు అర్జున్‌లు వెండితెరపై సందడి చేసేందుకు రంగం సిద్దమైంది. ‘సరైనోడు’ చిత్రంతో బ్లాక్ బస్టర్ హిట్ అందుకున్న అల్లు అర్జున్ ప్రస్తుతం వక్కంతం వంశీ దర్శకత్వంలో ‘నా పేరు సూర్య నా ఇల్లు ఇండియా’ చిత్రంలో నటిస్తున్న సంగతి తెలిసిందే. రచయిత నుండి దర్శకుడిగా ప్రమోట్ అయిన వక్కంత వంశీ తొలిసారి దర్శకత్వం వహిస్తున్న ఈ చిత్ర టీజర్ ఇటీవల విడుదలై యూ ట్యూబ్‌ను షేక్ చేసింది. దేశం ప్రాణం పెట్టే సైనికుడి పాత్రలో అల్లు అర్జున్ ఉగ్రరూపానికి విమర్శకుల ప్రశంసలు దక్కాయి.

ప్రస్తుతం చివరి దశ షూటింగ్ జరుపుకుంటున్న ఈ చిత్రంలో అల్లు అర్జున్ తండ్రి పాత్రలో సీనియర్ హీరో, యాక్షన్ కింగ్ అర్జున్ కనిపించబోతున్నాడు. ఇటీవల ‘లై’ చిత్రంలో ప్రతినాయకుడిగా మెప్పించిన అర్జున్.. ‘నా పేరు సూర్య నా ఇల్లు ఇండియా’ మూవీలో కీలక రోల్‌లో నటిస్తుండటంతో ఈమూవీ అంచనాలు రెట్టింపయ్యాయి. ఈ మూవీలో అనుఇమ్మానుయేల్ హీరోయిన్‌గా నటిస్తుండగా.. అన్ని కార్యక్రమాలు పూర్తిచేసి 2018, ఏప్రిల్ 27న ఈ సినిమా విడుదల చేయనున్నారు. బాలీవుడ్ సంగీత ద్వయం విశాల్ - శేఖర్ ఈ చిత్రానికి సంగీతం అందిస్తున్నారు.